“Forca e rimëkëmbjes së ekonomisë pas pandemisë së Covid-19, do të varet nga kush do ta fitojë garën mes varianteve të virusit dhe vaksinës”. Ka qenë kjo deklarata e shefes së FMN-sw Kristalina Georgieva, në konferencën virtuale të Davosit, e cila, teksa komunikonte me pjesëmarrësit e tjerë në konferencë, theksoi se FMN-ja ka parashikuar për 2021-in një rritje globale prej 5.5%, nga 3.3% që qe në 2020- n. Georgieva vuri në dukje se pandemia ka thelluar hendekun mes vendeve të zhvilluara dhe atyre në zhvillim, dhe pohoi se bashkëpunimi global në përballimin e krizës, nuk qe në lartësinë e duhur. Ajo pohoi se vendimi i presidentit të sapozgjedhur të Shteteve Të Bashkuara të Amerikës, Joe Biden, për t’u bërë sërish pjesë e marrëveshjes së Parisit të 2015-s mbi ndryshimet klimaterike, me gjasa do t’u japë një shtysë të re bashkëpunimeve në investimet për energjinë e pastër.
Ndërkaq, të pranishmit e tjerë, theksuan se rimëkëmbja post-kovid, do varet nga një përfshirje më e madhe e vendeve në zhvillim, që kanë kontribuar me rreth 1/3 të rritjes globale në dhjetëvjeçarin e fundit.
Sipas ministrit gjerman të ekonomisë, Peter Altmaier, rimëkëmbja post-kovid do kërkonte të paktën dy vite, dhe me konsumin global të energjisë, që sipas tij do rritej me 50 % brenda 2050s, do nevojitej me se s’bën krijimi i sinergjive për mbrojtjen e klimës.
Sipas krerëve botërorë të ekonomisë, vetëm rritja e taksave dhe stimuli ekonomik, mund ta përballonte rimëkëmbjen prej pandemisë. “Të vetmit fitimtarë të kësaj krize ekonomike, janë gjigandët dixhitalë, u shpreh ministri i financave francezë Bruno Le Maire, në gjykimin e të cilit ata duhet të paguajnë më tepër taksa.
Parisi ka kohë që ka kërkuar në fakt kontrollin e ndërmarrjeve teknologjike si Facebook dhe Google, të cilat shpesh përdorin boshllëqet ligjore, për t’i rregjistruar përfitimet e veta në vende me taksim të ulët.
Ideja e një takse të re dixhitale, është përqafuar ndërkaq edhe nga administrata e re amerikane, ndërkohë që Dmitri De Vreeze, bashkëadministrator i shumëkombëshes hollandeze Royal DSM, ka theksuar se tashmë ndërmarrjet, duhej të fillojnë rimodelimin e tyre, dhe nga monodimensionale, orientuar drejt përfitimit të pastër, duhej të filloinin e të qaseshin më tepër drejt konceptit në fillim njerëzit, planeti, pastaj përfitimi.
