Organizata Botërore e Shëndetësisë i ka bërë një kërkesë zyrtare Kinës për një informacion të detajuar mbi rritjen e sëmundjeve të frymëmarrjes dhe grupeve të pneumonisë të raportuara tek fëmijët, duke rekomanduar që popullata kineze “të ndjekë masat për të zvogëluar rrezikun e sëmundjeve të frymëmarrjes”.
Në mes të nëntorit, autoritetet kineze nga Komisioni Kombëtar i Shëndetësisë, raportuan një rritje të incidencës së sëmundjeve të frymëmarrjes në Kinë, ndërsa dy ditë më parë media dhe ProMED, raportuan raste të një pneumonie të padiagnostikuar tek fëmijët në Kinën veriore.
“Është e paqartë nëse këto janë të lidhura me rritjen e përgjithshme të infeksioneve respiratore të raportuara më parë nga autoritetet kineze apo nëse janë ngjarje të veçanta”, shpjegon Organizata Botërore e Shëndetësisë, e cila kërkoi “informacione të mëtejshme epidemiologjike dhe klinike, si dhe rezultatet e këto grupime raportohen tek fëmijët, nëpërmjet mekanizmit të Rregulloreve Ndërkombëtare të Shëndetit”.
OBSH i kërkon gjithashtu Kinës në kërkesat e saj, edhe një “informacion të mëtejshëm mbi tendencat e fundit në qarkullimin e patogjenëve të njohur, duke përfshirë gripin, SARS-CoV-2, RSV dhe mycoplasma pneumoniae, e po ashtu edhe mbi barrën aktuale në sistemet e kujdesit shëndetësor”.
Ndër masat e rekomanduara nga OBSH, janë vaksinimi, distancimi, maskat ku është e nevojshme si dhe “larja e rregullt e duarve”.