Duket se jeta e humbur në kampin MEK nuk ka lidhje me aksionin e policisë zhvilluar ditën e sotme në ambientet e këtij kampi, me synim kontrollin e situatës e të aktiviteteve që kryhen brenda tij.
Në një raportim për ABC News gazetari Leonidha Musaj, shprehet se një nga pjesëmarrësit në operacionin e kësaj të marte në brendësi të kampit, i ka pohuar se banorët kanë pyetur policinë pse ky kontroll, duke pohuar qysh në fillim se kishin një person të vdekur dhe duhej t’i bënin ritualet.
“Një burimi im i brendshëm që merrte pjesë në operacion, ështe shprehur se qysh në momentet e para që janë futur në ambientet e MEK, banorët i kanë pohuar policisë se kanë një person të pajetë dhe do i kryenin ritet”, ka thënë gazetari.
Kjo rrëzon deklaratën e zëdhënësit të MEK për mediat, i cili u shpreh se ky njeri ishte vrarë prej policisë shqiptare gjatë aksionit kryer prej saj.
Deri më tani Ministria e Brendshme, ka bërë me dije tensionet brenda kampit të MEK në Manëz, por pa viktima dhe as të lënduar.
