Teksa paraqiti arritjet e qeverisë në fushën dixhitale, drejtoresha e Akshi-t, Mirilinda Karçanaj, tha ndër të tjera se Akshi kishte gati tashmë edhe pasaportën e vaksinimit, të cilët qytetarët mund ta tërheqin nga e-albania, pasi të kanë marrë dy dozat e vaksinës.
Në këtë periudhë kur vaksinimi po shtrihet në gjithë vendin, kemi bërë gati pasaportën e vaksinimit, u shpreh ajo. Përmes e-albanias, qytetarët shqiptarë që do të vaksinohen, pajisen me një dokument elektronik, me standard të njohur ndërkombëtar. Së shpejti do kemi një shërbim vaksinimi totalisht të përmirësuar, do rezervohet orari për vaksnimin, do vijë përgjigjia sipas radhës, do kemi një kartelë personale të vaksinimit me vulë elektronike…
Nga sa shquhet në foton e paraqitur grafikisht gjatë fjalës së saj, kjo pasaportë vaksinimi do përmbajë, emër, mbiemër, numrin personal, datëlindjen, vendlindjen, llojin e vaksinës që ke marrë dhe datat e dozave.
