Teksa ka hipotetizuar një aneksim të mundshëm të Kanadasë e po ashtu edhe të Groenlandës, presidenti i zgjedhur i Amerikës, Trump, ka publikuar së fundmi në rrjetin e tij social “Truth”, një hartë të re të SHBA-së, brenda së cilës shquhet e përfshirë edhe Kanadaja si territor i saj, duke shkruar: “Oh Kanada!”, e duke vazhduar mandej me një tjetër postim e një tjetër imazh, atë të Shteteve të Bashkuara dhe Kanadasë, mbuluar nga flamuri amerikan me yje dhe vija. Kjo vjen në një kohë kur jo më larg se të martën, Trump kërcënoi se do të përdorte edhe “forcën ekonomike”, për ta aneksuar Kanadanë.
Ndërkaq, po për idenë e Trump, i cili edhe Groenlandën e shef si pjesë të SHBA-ve, ka reaguar Parisi, e më konkretisht, ministri i jashtëm francez, Jean-Noel Barrot. “Një territor autonom i Danimarkës”, është shprehur ai, “është “një territor i Bashkimit Evropian dhe BE nuk mund t’i lejojë kombet e tjera, kushdo qofshin ato, të shkelin kufijtë e saj sovran”.
Po në konferencën e përgjithshme për shtyp, Trump përmendi edhe modifikimin e kufijve të SHBA, duke folur për një aneksim të Ngushticës së Panamasë dhe Groenlandës, për të cilën hipotetizoi edhe përdorimin të forcës.
Veç të tjerave, Trump dëshiron të ndryshojë emrin e Gjirit të Meksikës në “Gjiri i Amerikës”. Në të njëjtën konferencë për shtyp, Trumpi u shpreh se donte të ndryshonte emrin e Gjirit të Meksikës, duke thënë se “Gjiri i Amerikës” do të ishte më shumë “e përshtatshme”.
“Ne do të ndryshojmë emrin nga Gjiri i Meksikës, në Gji të Amerikës, që ka një tingull të mrekullueshëm,” tha presidenti i zgjedhur. “Gjiri i Amerikës, sa emër i bukur dhe është i përshtatshëm!”
Këshilli federal ka fuqinë për të riemërtuar vendndodhjet gjeografike brenda Shteteve të Bashkuara, dhe kongresmenja republikane Marjorie Taylor Greene, premtoi të prezantonte menjëherë legjislacionin për zbatimin e planit.
