Instituti i Gjeoshkencave, Energjisë dhe Mjedisit, bën me dije se gjatë datave nga 7 deri në 11 janar 2021, në vendin tonë priten të bien rreshje të shumta shiu, pothuajse në të gjithë Shqipërinë, të cilat mund të shkaktojnë përmbytje në disa zona të vendit.
Sipas llogaritjeve të IGJEUM, thuhet në njoftim, përgjatë datave 7-11 janar 2021, priten rreshje shumë intensive, pothuajse në të gjithë territoritn. Nga llogaritjet hidrologjike të IGJEUM, këto rreshje do të sjellin rritje të rrezikshme të prurjeve në lumenjtë e mëdhenj e të mesëm, Drin-Buna, Mat, Ishëm, Erzen, Shkumbin, Seman dhe Vjosë.
Përmbytje mund të shkaktohen nga lumi Drin-Buna dhe liqeni i Shkodrës, me prurjet maksimale të cilat parashikohet të arrijnë zonat e rrezikuara në datën 12 janar.
Lumenjtë Mat dhe Ishëm, Erzen dhe Shkumbin, i arrijnë prurjet maksimale në fund të datës 8-9, kurse lumenjtë Seman dhe Vjosë, parashikohen të rrezikshëm, por me probleme më të vogla lokale nga përmbytjet.
Shkalla e rrezikut nga përmbytjet, sqaron IGJEUM, do të varet edhe nga sasia e shkrirjes së dëborës, si pasojë e rritjes së temperaturave.
