Gazetarja Kepi hedh poshtë fjalët e Ramës: ''Kryeministri i painformuar. Nuk qe thjesht një dyqan rrobash... "

E ftuar në emisionin “A Krasta Show” të moderatorit Adi Krasta, Alba Kepi gazetarja që zbardhi hetimet për rastin Katanxaro, thotë se kryeministri Rama qe i painformuar mbi çështjen e dyqanit të rrobave, hapur prej italianëve të hetuar si pjesë e Ndragheta-s, dhe se ajo mund të hedhë poshtë atë që deklaroi kryeministri Rama përpara gayetarëve, në takimin e djeshëm me ta.

… unë mund hedh poshtë ato që tha kryeministri në konferencë shtypi, u shpreh ajo. Më vjen keq, se është i painformuar, siç qe edhe mënyra si u trajtua ajo kronikë. Kryeministri tha se ata kanë hapur vetëm një dyqan. Nuk është thjesht dyqan veshjesh. Është një biznes, që shet artikuj veshjesh ndërtimi, të cilat përdoren me normativë ligjore, për të gjithë punonjësit në sektorin e ndërtimit, për të gjithë punonjësit që hapin rrugën, e detyrueshme. Janë këpucë, janë kaska, janë të gjitha që përdoren, në ato tendera publikë, që normativa ligjore e një vendi evropian, e një vendi anëtari i Bashkimit Evropian, apo i një vendi që aspiron të jetë në të, është i detyruar të zbatojë. Ky nuk ishte thjesht një dyqan. Ai ishte biznes, ishte një urë kalimi, për të hapur më pas shoqëritë offshore, për të pastruar paratë. Pikërisht këtë lloj biznesi, Antonio Galla, ‘Princi’ që është Xholi, siç nënvizpojnë autoritetet italiane në këtë biznes, e përdorte edhe në Itali, për të marrë tendera publikë për rrugët, për të marrë tendera publikë për ndërtimet, dhe, përmes dyqanit pra, siç thotë kryeministri, por që ishte një biznes që ai e përdorte për të pastruar paratë, për të derdhur paratë, për të ripërdorur, ricikluar paratë, për të marrë tendera të tjerë për veshjet e detyrueshme që duhej të kishin punonjësit.

E pyetur më tej nga moderatori Krasta, ajo u shpreh se, pas një bisede me prokurorin e çështjes, hetimet mbi këtë dosje nuk janë mbyllur ende, për shkak se përgjimet kanë vijuar deri 13 maj 2020, ndaj edhe përfundimet e prokurorisë së Katanxaros, nuk janë akoma përfundimtare, siç u shpreh kryeministri në konferencën me gazetarët.