Sipas ekspertëve të Shërbimit Metereologjik Ushtarak, stuhia “Filomena” nuk do ta prekë Shqipërinë. Situata që kaluam shprehen ata për MetropolPost, ishte indirekt pasojë e Filomenës, edhe pse ajo nuk depërtoi në vendin tonë. Aktualisht, thonë ata, Filomena e ka humbur forcën dhe është lokalizuar në Jug të Italisë.
Sipas Shërbimit Metereologjik Ushtarak, gjatë kësaj jave rreshjet në Shqipëri do të mbeten në formë shtrëngatash të vazhdueshme në pjesën jugore e juglindore të vendit. Ditën e martë dhe të mërkurë rreshjet e shiut do të jenë me intensitet të ulët në pjesën më të madhe të vendit. Pasditen dhe mbrëmjen e së mërkurës, në verilindje e juglindje borë e dendur.
Dita e enjte do të shoqërohet me rreshje shiu përgjatë bregdetit e pjesërisht zonave të ulëta. Në mesditë dëbora do të shtrihet në pjesën më të madhe të territorit në lartësitë kodrinore, ndërsa në veriperëndim ajo do të shtrihet deri në bregdet. Kjo situatë do të mbetet deri mëngjesin e së premtes dhe më pas do të mbizotërojë moti i kthjellët.
Ajo që vlen të theksohet është rënia graduale e temperaturave më e ndjeshme ditën e premte dhe në fundjavë. Vlerat negative parashikohet të regjistrohen në pjesën më të madhe të territorit. Kjo rënie do të sjellë ngrica të forta në akset rrugore. Era nga kuadrati i veriut e lehtë dhe përkohësisht mesatare, ndërsa ditën e premte hera-herës e vrullshme. Valëzimi në dete 3 dhe 4 ballë.
