Teksa e quajti Shqipërinë një vend mik dhe dy popujt respektivë si “vëllezër, që kemi jetuar së bashku me shekuj, kemi luftuar së bashku duke lënë histori, ku gjurmët e historisë sonë të përbashkët shekullore, shihen në fusha shumë të gjera, nga letërsia në art, në jetën intelektuale dhe arkitekturë, e se në ditët e sotme gjenden shumë gjurmë të historisë dhe kulturës sonë të përbashkët në Shqipëri, nga Elbasani në Korçë, nga Shkodra në Vlorë, presidenti turk Taip Erdogan, gjatë nënshkrimit të Marrëveshjes së Partneritetit Strategjik me kryeministrin Rama për Shqipërinë, nuk ngurroi të theksonte se Turqia, e konsideronte si detyrë forcimin e mëtejshëm të kësaj lidhjeje.
Kështu, në këtë kontekst, ai shprehu gatishmërinë për ta ndihmuar Shqipërinë, veçanërisht në fushat e ekonomisë, arsimit dhe kulturës.
Turqia është partneri tregtar i katërt më i madh i Shqipërisë, tha ai në fjalën e tij.
Duke marrë parasysh dhe shërbimet kontraktuese, ne jemi investitori më i madh i huaj në Shqipëri, me një investim total prej 3,5 miliardë dollarësh. Më shumë se 600 kompani turke, që operojnë në Shqipëri, sigurojnë punësim për më shumë se 15 mijë vëllezër shqiptarë. Në periudhën e ardhshme, ne planifikojmë t’i rrisim investimet tona në Shqipëri, veçanërisht në fushat e infrastrukturës dhe turizmit. Kështu, ne parashikojmë që bashkëpunimit tonë në ekonomi, t’i japim një tjetër dimension.
Ne i kushtojmë rëndësi të madhe ruajtjes së objekteve historike nga periudha osmane, të cilat pasqyrojnë kulturën tonë të përbashkët.
Ne kemi zbatuar mbi 500 projekte restaurimi me vlerë afërsisht 20 milionë euro në Shqipëri përmes TIKA-s. Ministrat tanë të Kulturës nënshkruan pak më parë protokollin për restaurimin e objektit më të rëndësishëm, që është Xhamia e Plumbit në Shkodër, e cila do të restaurohet nga Drejtoria e Përgjithshme e Fondacioneve, dhe shpresoj që ky projekt të fillojë pranverën e ardhshme.
Një nga pikat kryesore të axhendës së takimeve tona, ishte dhe bashkëpunimi ynë në luftën kundër terrorizmit, si dhe në fushat ushtarake e atë të mbrojtjes.
Ne dhe autoritetet shqiptare, biem dakord se organizata terroriste e FETO-s, përbën kërcënim për të dyja vendet. Ne nuk do ta lejojmë FETO-n që të helmojë marrëdhëniet mes dy vendeve.
Me këtë rast, Turqia, me në krye fondacionin e Maarif dhe tërë institucionet e tjera, do jenë pranë Shqipërisë. Fondacioni i Maarif, që ka marrë Universitetin e New York-ut në Tiranë, nesër, bashkë me universitetin Teknik të Stambollit, do të vijë edhe rektori këtu, do hedhin hapat e para të bashkëpunimit mes dy vendeve.
Tani janë pothuajse 100 studentë shqiptarë që po studiojnë në Universitetin Teknik të Stambollit. Me këtë hap, Ne, në bashkëpunimin tonë në fushën e arsimit me Shqipërinë, kemi hedhur një hap shumë të rëndësishëm, përfundoi ai fjalën e tij.
