Presidenti i Haitit Jovenel Moïse është vrarë natën e sotme nga persona të panjohur, në shtëpinë e tij në kryeqytetin e vendit.
Lajmin e bën të ditur kryeministri i vendit Claude Joseph, i cili deklaron se shtëpia e presidentit në Port-au-Prince, është sulmuar prej njerëzve të armatosur, të paidentifikuar, në orën 01:00 me orën lokale. Gjatë sulmit, e plagosur ka mbetur edhe bashkëshortja e tij, Martine Moïse.
Joseph pohoi se janë marrë të tëra masat për të garantuar vazhdimësinë e shtetit, teksa ka marrë në dorë drejtimin e vendit dhe i ka bërë thirrje publikur të ruajë qetësinë.
Në fjalën e tij, ai e konsideroi vrasjen e presidentit si një akt barbar e çnjerëzor.
Pas marrjes vesh të lajmit, kryeministri britanik Boris Johnson është shprehur se është i tronditur dhe trishtuar nga vdekja e Moïse-së, duke e cilësuar atë një akt të pafalshëm e duke bërë thirrje për qetësi, ndërkohë që Shtëpia e Bardhë e ka cilësuar vrasjen si një krim të tmerrshëm.
Republika Domenikane që është në kufij me Haitin, pas marrjes vesh të lajmit, urdhëroi mbylljen e menjëherëshme të kufirit me të.
