Një rast i paprecedentë është denoncuar ditën e sotme prej gazetares së kronikës Anila Hoxha, e cila sjell mes shumë rasteve që has përditë, atë të një burri të sapo dënuar me burgim, për hir se goditi të shoqen në inat e sipër, e cila i kërkoi të shiste shtëpinë për të shkolluar shtatë bijat në Tiranë. Cifti kishte shtatë vajza, të cilat donin t’i shkollonin të tëra në Tiranë, por shtëpia, edhe pse burri kishte vendosur ta shiste, nuk e kishte kapur dot atë shumë, duke sjellë si pasojë një sherr mes gruas e burrit, që ka përfunduar ditën e sotme në burg. Sa më poshtë rasti i plotë i denoncuar prej gazetares Anila Hoxha, i cili në fakt të nxit të reflektosh se a mundet një prind i gjorë të shkollojë njëherëshi shtatë fëmijë në Tiranë, pa shitur shtëpinë e pa përfunduar në burg prej nervave që nuk i mbajnë më
Historia e plotë rrëfyer prej gazetares Anila Hoxha
Kudo që të shkosh, do jesh vajza ime….
Histori e vështirë për t’u treguar.
I lashë pushimet mbas një telefonate që më njoftoi: “Nesër del para gjyqtares Majlinda Doga, në Tiranë një nënë me shtatë vajzat e saj. Kërkojnë urdhër mbrojtjeje nga kryefamiljari, sepse ai nuk pranon që të bijat të ndjekin shkollën”.
Kur po udhëtoja drejt Tiranës, mendova çdo version të mundshëm. Atë të disave që kam ndeshur në seanca gjyqësore, që nguten t’i martojnë bijat, të thyer nga paragjykimi dhe dobësia për t’i lënë të lira në jetën e tyre. Derisa ato të zgjedhin vetë.
Të parat mbërritën vajzat dhe e ema. Ishin marrë në mbrojtje nga shteti. Në fund sollen babain. Një 44 vjeçar, që mbahej përkrah nga një polic dhe duart i kishte të kyçura në pranga. Iu drejtua të madhes, sapo e ndeshi në korridor “Bijë – i tha, – kudo që të shkosh do jesh vajza ime”.
Çifti u martua në vitin 2001. Çifti ishte në kërkim të një djali dhe sollën në jetë shtatë vajza. Pas çdo shtatzanie, e qara e foshnjës dukej se njoftonte sërisht “linda vajzë”. Megjithatë bijat nuk e zhgënjyen babën dhe nënën, të tëra me rezultate të larta në shkollë. Por gruaja, me sytë përtokë i përgjigjet gjyqtares se ndonëse u martua me një bashkëshort të përkushtuar, të cilin e ndihmonte në biznesin privat që kanë, ajo kishte zë të dobët për të vendosur në familje. “A është siç kanë deklaruar vajzat në polici, se babai nuk lejonte shkollimin, – pyet gjyqtarja, që synon të jetë e qartë, nëse bëhet fjalë për një zënkë ekonomike e për pasojë vajzat mbajnë anën e nënës.
Vajza e madhe, sot 20 vjeçe ndjek një universitet të njohur në kryeqytet, edhe e dyta. Aty shkëlqejnë. Të tretën e morën të ndjekë gjimnazin dhe jetojnë së bashku. Po bëheshin gati të rregjistronin të katërtën edhe atë në gjimnaz. “Duhet të ikja në një intership në Itali dhe babai në grindje e sipër deklaroi “Jo nuk do shkosh”, i pohon gjykatës më e madhja. “Shkolla është e rëndësishme për mua”, përshpërtit e reja. I ati përgjigjet “Po shisja shtëpinë, që të jemi bashkë në Tiranë, çfarë ju ka munguar? Me këto duar e kam bërë natën ditë për ju.”
Por vajzat dëshmojnë se kur u zgjuan, panë prindërit duke u grindur. E mandej duke u shtyrë me duar. Në një moment babai bërtiste “në këtë shtëpi do bëhet siç them unë” . Ato hynë për t’i ndarë, dhe ai e qëlloi njërën prej tyre me shuplakë. Kur situata doli krejt nga kontrolli, vajzat i thonë gjyqatres se i rreshtoi dhe i pyeti “ a doni të shkoni në Tiranë, ikni”.
“Ky ishte momenti kur babai doli nga shtëpia. Edhe për mua shkolla është e rëndësishme, edhe për motrat e mia”, i thotë gjyqtares vajza tjetër. Është e dyta që ndjek si e motra një universitet privat. Pranon që cdo javë babai dhe nëna udhëtonin nga qyteti i tyre për t’i takuar e për t’u kujdesur.
Por familja duhej bërë bashkë. E shtëpia duhej shitur. Por babait ia kërkuan shumë lirë shtëpinë ku ato u rritën, dhe ai nuk po e shiste dot me një çmim të arsyeshëm. “Këtu do hyja në kredi, sepse me aq para nuk plotësohej çmimi i një apartamenti në kryeqytet” – përpiqet t’i shpjegojë të shoqes se në prani të gjyqtares.
Por ai ishte aq nervoz, saqë u bë agresiv dhe e rrahu të shoqen. Pastaj të bijën. Pastaj ato u larguan në Tiranë. Kur u kthye, ai shkoi në policinë lokale, e cila telefonoi gruan e megjithatë gruaja thotë “nuk i tregova se ku gjendeshim, mbasi kisha frikë prej tij”.
Nga data 22 gusht , kryefamiljari udhëtoi për në Tiranë, i kërkoi dhe nuk i gjeti. Shkoi sërisht në polici për të njoftuar, ku dhe u arrestua, mbasi ishte denoncuar për dhunë në familje nga bashkëshortja dhe të bijat.
“Unë kërkoj urdhër mbrojtjeje”, thotë gruaja e tij, nëna e fëmijëve. “Kishim vendosur t’i shkollonim vajzat në kryeqytet, mbasi këtu shkollat janë më të mira se atje ku jetojmë, por ai ndërron vazhdimisht mendje. Kërkoj urdhër mbrojtjeje edhe për vajzat tona.”
Ai mbulon fytyrën me pëllëmbët plot kallo dhe shpërthen në të qara.
“Kam duruar boll, nuk duroj më dot”, shpjegon zë mbytur 42 vjecarja” Gjykata vendos, burri iku në burg, nëna me shtatë vajzat dërgohen në një strehëz.
Cila është e vërteta? Duart e të dy prindërve ishin plot kallo. Ata rritën bashkë shtatë vajza, dhe që të shtata duhen shkolluar.
