Çdo mbrëmje, Dritonjëza, e bija e rojës së farit, ngjit gjashtëdhjetë e një shkallë, për të ndezur dritën që lajmëron anijet t’u rrinë larg shkëmbinjve. Por, një natë me stuhi, ajo sheh se nuk ka më kunja shkrepseje. Kështu, drita nuk ndizet dhe një prej anijeve përplaset pas një shkëmbi.
Për të shlyer dëmin, Dritonjëzës i duhet të punojë shtatë vite në shtëpinë e Admiralit, tek Shtëpia e Zezë, ku thuhet se jeton një përbindësh. Ajo që vajza do të zbulojë aty, është në fakt, edhe më mahnitëse se mund ta mendojë ndokush…
Ky është me pak fjalë subjekti i librit më të ri për fëmijë ardhur në shqip, i autores holandeze Annet Schaap, e cila ka fituar në fakt disa çmime, përfshi edhe çmimin Gouden Griffel, që jepet në Hollandë për librin më të mirë të vitit për fëmijë.
Ardhur në shqip nga një penë si e Agim Doksanit, i cili fitoi këtë vit në fakt edhe çmimin si përkthyesi më i mirë në Panairin e 23 të Librit, duket se mjaft shpejt, ky libër do të kthehet në një prej librave më të pëlqyer për fëmijët.
Veçoria e këtij libri, thotë Doksani për MetropolPost, ka të bëjë me atmosferën e ngrohtë e shumë të përzemërt, që autorja ka arritur të krijojë mjeshtërisht, duke iu kthyer në një farë mënyre letërsisë klasike për fëmijë, ku elementi i përshkrimit të natyrës, veçorive të personazheve, gërshetohet më së miri me elementet edukative. Ngrohtësia, dashuria dhe respekti për tjetrin, e përshkojnë nga fillimi në fund këtë roman, pa lënë pas dore edhe elementin e aventurës, atë fantastik, aq të nevojshëm për të ushqyer fantazinë e fëmijës dhe njëherësh për ta edukuar me elementet më të qenësishëm të sjelljes dhe të rrugëtimit në jetë.
Autorja ka kërkuar pareshtur të ndërtojë personazhe që të rrëmbejnë zemrën, dhe ia ka dalë mbanë, duke përvijuar një personazh vërtet të dashur për lexuesin e vogël, por jo vetëm. Duke gërshetuar mjeshtërisht peizazhet e mrekullueshme, në funksion të nxjerrjes në pah karakterit të vogëlushes, Schaap, me këtë personazh, sa të thjeshtë e të përulur, aq edhe të paepur para vështirësive, ndez fantazinë e të vegjëlve. Mund të thuhet me plot gojën, që ia ka arritur më së miri, të ndërtojë një personazh vërtet të dashur për lexuesin.
Ky është libri i parë i Annet Schaap si shkrimtare, pas një përvoje si ilustruese, duke shfaqur një talent mbresëlënës në mënyrën se si e gërsheton botën magjike dhe fantastike me jetën reale, problemet dhe sfidat e saj. Dhe e bën këtë nëpërmjet një arkitekture narrative fort të arrirë, ku çdo element zbulohet mjeshtërisht gjatë zhvillimit të historisë.
Kështu Dritonjëza, e tërheq lexuesin në një botë përrallash, ku bashkëjetojnë piratët, sirenat, artistët e çuditshëm, ku gjendemi brenda një historie që nis pikërisht aty ku mbaron përralla e Sirenës.
Një histori ku jetohet me kurajo, në emër të miqësisë, për lirinë dhe të drejtave e qenieve të ndryshme, e cila fton këdo t’i bashkohet në këtë copë udhë.
