Dhëndri i të moshuarës videoja e së cilës tronditi mbarë opinionin publik prej dhunës së pacipë që ushtrohej prej infermiereve ndaj saj, ka deklaruar se e kishin shpënë aty të vjehrrën për shkak se ajo vuante nga alzhaimeri dhe besonin se aty do t’i ofronin kujdesin e nevojshëm.
“Ne e kemi vendosur aty për të pasur një kujdes të veçantë si një e moshuar, e diagnostifikuar me Alzheimer”, ka deklaruar ai për mediat vendase. “Kjo ishte e vetmja zgjidhje për familjarët. Qendra thuhej se i përmbushte të gjitha standardet për kujdesin ndaj saj dhe menduam për më mirë. Ajo kishte një vit në qendër. Nuk e kemi dalluar sepse sëmundja nuk na lejonte që ta kuptonim, të merrnim informacione. Në pamundësi për t’u kujdesur nga oraret e gjata të punës, njëri djalë është vrarë gjatë luftës, djali tjetër është në Greqi, gruaja është në punë me orar të gjatë, kur ka qenë në Gjakovë në shtëpi kishim marrë dy kujdestare por duke menduar gjendjen e saj familjarët menduan se kjo e gjitha do ishte zgjidhje më e mirë. Tani është në shtëpinë tonë, është me infermiere. Ajo nuk e njeh vajzën e saj, mbesën, nipin. Nuk ka qenë në gjendje të na japë asnjë informacion përveç paraqitjes fizike. Nuk ka dëmtim fizik. Ka bërë vizitë mjekësore pasi pritet të dalë raporti i autoriteteve“, ka deklaruar mes të tjerave ai.
