Kanë dhënë mesazhe kuptimplota edhe për njëri-tjetrin dy krerët më të debatuar të realitetit politik shqiptar, kreu i qeverisë Rama dhe ai i shtetit Meta, gjatë ceremonisë së nisjes së stërvitjes “Defender Europe 21”, mbajtur sot në portin e Durrësit.
Gjenerata jonë u rrit me idenë se ju nuk duhej të lejoheshit kurrë të shkelnit në këtë vend, u shpreh Rama. Ne u brumosëm nga propaganda e regjimit të shkuar, me bindjen se ju jeni e keqja më e madhe që mund t’i ndodh jo vetëm Shqipërisë, por mbarë botës dhe realisht për gjeneratën tonë, që e ka ndarë jetën mes dy botëve, asaj të errëtës e të izoluarës, është një mrekulli e madhe që ne mund të mirëpresim miqtë dhe partnerët tanë të shumtë e mbi të gjithë miqtë tanë amerikanë.
Dua të besoj shumë që pas zbarkimit të trupave tuaj në Shqipëri, edhe juve do t’ju ndodh ajo që u ndodh shumëve kur vijnë, që do të doni të ktheheni përsëri. Shqipëria nuk është një vend i këshilluar për të ardhur për shkak të stereotipeve që e pengojnë marrëdhënien e saj me botën, por është një vend ku kush vjen, do të kthehet përsëri dhe unë kam shumë dëshirë dhe besoj që do të ndodhë edhe me ju, tha Rama, duke ndërmendur indirekt edhe imazhin e Shqipërisë si një vend i korruptuar me zgjedhje të manipuluara, krijuar kryeshit nga opozita në vend.
Ndërkohë Meta, teksa e ka cilësuar këtë stërvitje si një mundësi të shkëlqyer për të rritur aftësitë operacionale, është shprehur se është e rëndësishme që Shqipëria to arrijë atë nivel besueshmërie që kërkon dhe roli dhe pozicioni i saj strategjik, duke theksuar se me këtë garanci, ne do tregojmë se jemi të gatshmën të mbrojmë vlerat e lirisë: Ne do të vazhdojnë në rrugën e lirisë e të qytetërimit europian, u shpreh Meta, dhe për këtë, një garanci e fortë është përkatësia jonë në Aleancën Euroatlantike, si aleanca më e madhe e lirisë dhe demokracisë në botë. Jam i sigurt, përfundoi ai se përmes kësaj stërvitjeje madhore, do tregojmë se jemi të gatshëm në çdo kohë, të mbrojmë vlerat e lirisë në Europë dhe hapësirën euroatlantike.
