Sipas mediave më në zë turke, muajt e fundit Turqia, anëtare e NATO-s, ka shprehur interes për t’u bashkuar me grupin BRICS të ekonomive në zhvillim, që përfshin Brazilin, Rusinë, Indinë, Kinën, Afrikën e Jugut, Etiopinë, Iranin, Egjiptin dhe Emiratet e Bashkuara Arabe (EBA).
Sipas tyre, presidenti Tayyip Erdoğan mori pjesë në një samit të liderëve të BRICS, organizuar nga presidenti rus Vladimir Putin në Kazan muajin e kaluar, pasi Ankaraja deklaroi se kishte ndërmarrë hapa zyrtarë për t’u bërë një anëtare e plotë e grupit.
“Sa i përket statusit të Turqisë në lidhje me anëtarësimin (BRICS), ata i ofruan Turqisë statusin e anëtarësimit partner,” deklaroi ditën e djeshme ministri i Tregtisë turke Bolat, në një intervistë me transmetuesin privat TVNet. “Ky (status) është procesi i tranzicionit në strukturën organizative të BRICS,” u shpreh ai. Ndërkohë që Erdogani, ka deklaruar se “Ankaraja e sheh grupin BRICS si një mundësi për të çuar më tej bashkëpunimin ekonomik me vendet anëtare, dhe jo si një alternativë ndaj lidhjeve që ka me vendet perëndimore dhe anëtarësimin në NATO”.
Zyrtarët turq janë shprehur vazhdimisht se anëtarësimi i mundshëm në BRICS nuk do të ndikojë në përgjegjësitë e Turqisë ndaj aleancës ushtarake perëndimore.
Përveç anëtarësimit të plotë, anëtarët e BRICS prezantuan një kategori si “vend partner” në Kazan, sipas deklaratës së lëshuar nga BRICS më 23 tetor.
Ministri i Tregtisë Bolat nuk sqaroi nëse Ankaraja e kishte pranuar propozimin, por ndërkaq, po sipas mediave vendase, një zyrtar në Partinë për Drejtësi dhe Zhvillim (AK Parti) në pushtet të Erdoganit qe shprehur për Reuters se ndërsa propozimi ishte diskutuar në Kazan, statusi i vendit partner do të ishte më pak se kërkesat e Turqisë për anëtarësim.
Sipas mediave vendase, Bolat ka mohuar pretendimet se India kishte bllokuar anëtarësimin e plotë të Turqisë në BRICS, për shkak të lidhjeve të ngushta të Ankarasë me Pakistanin rival.
Erdogani, në pushtet për më shumë se dy dekada, është përpjekur të krijojë një politikë të jashtme më të pavarur për Turqinë, dhe të rrisë ndikimin e saj global. Vendi, anëtar i NATO-s, është frustruar nga mungesa e përparimit në bisedimet e anëtarësimit me Bashkimin Evropian.
BRICS synon të përforcojë zërin e ekonomive të mëdha në zhvillim për të kundërbalancuar atë që ai e konsideron të jetë rendi global, i udhëhequr nga perëndimi. Anëtarët themelues të tij kanë bërë thirrje për reformimin e institucioneve ndërkombëtare si Kombet e Bashkuara, Fondi Monetar Ndërkombëtar dhe Banka Botërore.
Vendet anëtare përfaqësojnë pak më pak se gjysmën e popullsisë së botës dhe rreth një të tretën e prodhimit të brendshëm bruto global. Si “platformë”, ajo nuk imponon detyrime ekonomike të detyrueshme për anëtarët siç bën BE-ja, në derën e së cilës Ankaraja troket që nga viti 1999.
Nëse Turqia pranohet, do të jetë anëtarja e parë e NATO-s, që do t’i bashkohet kësaj aleance, e cila e sheh veten si një kundërpeshë ndaj fuqive perëndimore dhe anëtarët e së cilës janë ashpër në kundërshtim me Perëndimin për disa çështje, veçanërisht konfliktin e vazhdueshëm në Lindjen e Mesme.
