Një ndërprerje masive e energjisë elektrike ka goditur Spanjën, Portugalinë dhe një pjesë të Francës, dhe shkaku, sipas operatorit të rrjetit portugez, mund të jetë fenomeni i njohur si “dridhje atmosferike e nxitur”.
Teksa energjia është shkëputur ngado, kaosi ka pushtuar trenat, aeroportet dhe rrjetet telefonike, ndërkohë që qeveria spanjolle u ka bërë thirrje njerëzve të mos ngasin makinat.
Sipas mediave vendase ngjarja ndodhi rreth orës 12.30 të mesditës së sotme dhe preku gjithë territorin e Spanjës, Portugalisë dhe një pjesë të Francës Jugore.
Sipas operatorit portugez të rrjetit “Ren”, cituar nga Reuters, arsyeja lidhet me një fenomen të rrallë atmosferik: për shkak të ndryshimeve ekstreme të temperaturës në Spanjës, luhatjet anormale ndodhën në linjat e tensionit shumë të lartë, duke shkaktuar një fenomen i njohur si “dridhje atmosferike e nxitur”.
Për momentin, burime zyrtare nga Spanja, Portugalia dhe Bashkimi Evropian, shpjegojnë se nuk ka indikacione që sugjerojnë ndonjë sulm hakerash: “Nuk ka asnjë tregues se ndërprerja e energjisë elektrike është provokuar”, tha nënkryetarja spanjolle e Komisionit Evropian Teresa Ribera.
Qeveritë e Madridit dhe Lisbonës kanë thirrur takime urgjente, në përpjekje për të koordinuar përgjigjen ndaj ndërprerjes së energjisë elektrike.
“Red Eléctrica” tha se mund të duhen “6-10 orë” për t’u kthyer në normalitet, ndërsa operatori portugez deklaroi se “kompleksiteti i fenomenit dhe nevoja për të ribalancuar rrjedhat e energjisë elektrike në nivel ndërkombëtar, çojnë në frikën se normalizimi i plotë i rrjetit, mund të zgjasë deri në një javë”.
