Ish lideri i Partisë Demokratike Sali Berisha ka bërë me dije se avokati i tij francez ka dorëzuar padinë e tij për shpifje, ndaj Sekretarit Amerikan të Shtetit, Anthony Blinken, në Gjykatën Korreksionale të Parisit.
Në njoftimin e tij Berisha sqaron se kjo padi synon të mbrojë dinjitetin e tij e të familjes së tij, e po ashtu edhe transparencën përpara atyre që e kanë votuar për 30 vjet. Berisha bën me dije, gjithashtu, se i ka bërë kërkesë Blinkenit të publikojë faktet ku bazon akuzat mbi të, por deri më tani pa përgjigje.
Kujtojmë që pak kohë më parë, edhe ambasadorja amerikane Yuri Kim i bëri kërkesë Bashës që të mos e lejonte Berishën të kthehej në Parlament, për shkak se një PD e tërë s’mund të hante bar për hir të një njeriu të vetëm, kërkesë së cilës Berisha iu përgjigj me të njëjtën këmbëngulje si Blinkenit, duke i kërkuar ambasadores amerikane, t’i kërkonte ndjesë popullit shqiptar, i cili është ka dinjitetin e tij dhe nuk ha bar.
Njoftimi i plotë i Berishës:
Avokati im Jean Yves Le Borge ka dorëzuar padinë time për shpifje në Gjykatën Korreksionale të Parisit.
Siç ju kam njoftuar më parë se, pas vendimit të Sekretarit te Shtetit, Antiony Blinken për të shpallur non grata mua, bashkëshorten dhe dy fëmijët e mi, bazuar në keqinformimin nga lobimi korruptiv hakmarrës të Edi Ramës dhe mikut e mbrojtësit të tij multimiliardierit George Soros, unë autorizova avokatin tim në Francë zotin Jean Yves Le Borgne të ngrejë padi për shpifje ndaj Sekretarit të Shtetit, Blinken, në gjykaten korreksionale te Parisit.
Javën që kaloi avokati Jean Yve Le Borgne ka dorëzuar këtë padi pranë kësaj gjykate. Sipas avokatit tim, kjo padi në gjykatë për shpifje bazohet në precedentë të mëparshëm të ngjashëm dhe në parimin universal se për shpifjen nuk ka imunitet, sepse ajo nuk hyn në funksione zyrtare dhe për rrjedhojë, imuniteti në rastin e shpifjes, nuk mund të përdoret si mburojë. Padia ime bazohet dhe në parimin tjetër universal, sipas të cilit shpifja në internet dënohet kudo ku del lajmi, pra ku ndodh dëmi. Vetkuptohet, gjithçka varet nga interpretimi i gjykatësit, që do gjykojë çështjen.
Me këtë rast, i bëj thirrje sekretarit Blinken, në emër të transparencës të dërgojë pranë kësaj gjykate çdo fakt, dokument dhe prove, që ai apo çdokush tjetër në botë disponon kundër Sali Berishës dhe familjarëve të tij.
Zonja dhe Zotërinj,
Me këtë rast gjithashtu dëshëroj t’ju informoj sa vijon:
Së pari se, sot, pas 77 vitesh jetë, kjo është hera e parë që unë i drejtohem një gjykate dhe kurrë ndonjë herë nuk kisha imagjinuar së unë do detyrohesha të ngreja padi ndaj Sekretarit të Shtetit të SHBA, të një vendi që unë admiroj kaq shumë.
Së dyti, me këtë padi unë kërkoj të mbroj dinjitetin tim, të familjes time dhe të të gjithë shqiptareve që unë gjate 30 viteve karriere politike, i kam përfaqesuar me dinjitet.
Pra, kjo padi, ështe një betejë për dinjitet njerezor, i cili është një vlerë e shenjtë për mua dhe çdo njeri të lirë.
Së treti, me këtë padi kërkoj të bej transparencë të plote para shqiptareve, që në 30 vite me kanë votuar më shumë se cilindo tjeter në këtë vend, dhe para miqve te mi, të shumtë në Shqipëri dhe kudo në botë, dhe të provoj se ky vendimi është fund e krye politik dhe pa asnjë baze, pra është sine materia.
Karakterin politik të këtij vendimi e provon dhe fakti se me gjithë kërkesën paraqitur në letrën time të datës 19 maj 2021, drejtuar sekretarit Blinken për të bërë publike çdo fakt, dokument, provë që ai disponon, por edhe kërkesave të mediave, që të faktojë akuzat ndaj meje dhe familjarëve të mi, gjer sot nuk është paraqitur as dhe një e vetme e tillë, për shkakun e vëtem se ato nuk ekzistojnë.
Me dt. 22 maj, zëdhenesi i Departamentit të Shtetit i ka deklaruar nje gazete shqiptare se burimet e informacionit mbi të cilat është bazuar vendimi i Sekretarit Blinken kanë qenë raportet e NGO, lokale, rajonale, ndërkombëtare (të gjitha të sponsorizura nga George Soros shënim i im), raportet e mediave (të kontrolluara nga qeveria, shënim i im) dhe raportet e hetimeve antikorrupsion të qeverise shqiptare ( dmth raportet sekrete të Edi Rames, të cilat nuk janë publikuar kurrë në Shqipëri, shënim i im).
Kjo dëshmon se vendimi i marrë kundra meje dhe familjarëve të mi, bazohet në shpifjet dhe trillimet e për qëllime politike të kundërshtarëve te mi George Soros dhe Edi Rama. Ai është një hakmarrje e tyre politike për mbrojtjen nga ana ime të interesit publik dhe kombetar të shqiptarëve, denoncimin tim te dhunimit të zgjedhjeve nga Edi Rama, të lidhjeve të tij me krimin, kartelet e drogës, pasuritë e paligjshme dhe korrupsionin e tij.
Ai është një hakmarrje për denoncimin tim publik të rolit të OSF në vendosjen nën kontrollin e plotë qeverisë të rrjetit të NGO dhe së fundi të sistemit të drejtesisë në Shqipëri. Në veçanti, ky vendim është hakmarrje politike për kundërshtimin tim, të prerë të ndryshimit të kufijve të Kosovës, sipas projektit të Fondacionit të Shoqerisë së Hapur në Beograd.
Mungesa e plotë e transparencës në këtë vendim, fakton katërcipërisht se ky vendim është fund e krye politik, dhe shënon një abuzim të hapur me ligjin e kongresit te SHBA, përdorimin e tij si armë politike kundër kundërshtarëve të qeverisë më të korruptuar te Europës dhe protektorit e mikut të ngushtë të Edi Ramës, multimiliardierit George Soros.
Por pavarësisht nga këto unë nuk kam ngritur padi kundër vendimit hakmarrës politik të shpalljes time non grata është e drejtë ekskluzive e Sekretarit Blinken të përcaktojë se kush do hyjë apo nuk mund të hyj në vendin e tij. Por unë kam ngritur padi kundër shpifjeve mbi të cilat bazohet ky vendim.
Karakterin e mirëfilltë politik të këtij vendimi e provon plotësisht edhe kërkesa publike e ambasadores së SHBA në Tiranë, Kim, për mosfutjen time në parlament, duke mos patur asnjë fakt, provë apo dokument per tju paraqitur shqiptareve perveç kërcënimeve me dogmën e barit që ka përdorur dikur diktatori Hoxha dhe e përdorin albanofobe antishqiptar.
Duke përfunduar, shpreh besimin tim të plotë tek paanësia e gjykatës dhe garantoj shqiptarët se mbi këtë planet nuk ekziston njeri, institucion që mund të disponojë një provë, fakt, apo dokument të vetëm që të faktojnë korrupsion domethënëse me fondet publike të buxhetit apo çfarëdolloj forme tjetër korrupsioni.
