Kryetari i Partisë Demokratike, Sali Berisha, teksa komentoi shpenzimet e fushatës, tha se PD ka bërë deklarime të sakta, ndërsa mazhoranca ka mashtruar. Sipas tij, vetëm Belinda Balluku ka shpenzuar në Fier gjatë fushatës 5 milionë euro, pa llogaritur shpenzimet që kanë bërë ‘ushtarët’ e saj.
“Ju garantoj që pa të paktën 5 milionë Lubia në Fier nuk është ndarë, vetëm Lubia, por ka një gjë, në raportojmë shifra të sakta, ata mashtrojnë. Pa llogaritur sa kanë shpenzuar për llogari të Lubisë, Arben Qimja, Renato Salhi dhe Hakmarrja për Drejtësi, që i kishte si ushtarë me vete Lubia”, tha Berisha.
I pyetur pse PD nuk organizon protesta për Ballukun, Berisha u përgjigj:
“Ju garantoj se protesta shumë të fuqishëm do organizohen, por protestat do të organizohen për hajdutin kryesor të kombit, sepse tani qesharak nuk bëhemi ne. Të themi se tunelin 50 mln e kemi prej kësaj. Ja ku është autori. Kështu që ne do organizojmë protesta shumë të fuqishme dhe hajduti më i madh i shqiptarëve, qytetarët shqiptarë nuk do ti ndahen derisa ti japin vendin që meriton”.
