Në intervistë për emisionin e mëngjesit “Koha për t’u zgjuar”, lideri demokrat Lulëzim Basha është shprehur se është hera e parë që kryeministri në pushtet nuk jep përgjigje se ç’ka bërë këto 8 vite, por merret me kundërshtarin e vet. Njerëzit, tha Basha, teksa jepte përshtypjet e marra nga njerëzit për librin e tij “Misioni im”, kanë etje për normalitet, për t’i ikur zhurmës, teatrit, konfliktit që ka ngjallur politika vitet e fundit.
Jam surprizuar pozitivisht nga vlerësimi apo recensa e njerëzve të ndryshëm, që nga lexuesit e thjeshtë, tek shkrimtarë, publicistë, njerëz aktiv në politikë, u shpreh ai, dhe kjo më shumë se sa një kompliment për mua, shënon një etje të shoqërisë për normalitet, një etje të shoqërisë për t’i ikur zhurmës, teatrit, konlfliktit që ka ngjallur politika në veçanti 8 vitet e fundit, si një instrument për t’i ikur bilancit […]. Në vend që gjerat të shkonin përpara kanë mbetur në vend, ose ka shkuar prapa, dhe pastaj ajo që dominon është zhurma, është sajesa, është mungesa e alternativës dhe mbi të gjitha e mbi të gjitha në këtë fushatë, unike në 30 vite, është mungesa e bilancit të dikujt që ka qeverisur 8 vite. Shikoni, ka qeverisur 8 vite. Fushata ka edhe 3 javë, edhe më pak se 3 javë, dhe ne s’dëgjojmë gjë tjetër veçse sharjeve dhe fyerjeve ndaj kandidatit për kryeministër. Pra, kryeministri që duhet japë përgjigje se ç’kanë bërë këto 8 vjet, merret gjithë ditën me kandidatin për kryeministër, prandaj e kam quajtur, besoj do ketë një kohë pastaj edhe pas fushatës për ta analizuar këtë, e kam quajtur satelitin tim. Është hera e parë që kryeministri në pushtet, kthehet në satelit të kandidatit për kryeministër. Këtë ka bërë edhe dje, këtë ka bërë edhe pardje, dhe këtë vazhdon të bëjë. Pse? Se nuk ka asgjë për t’u thënë shqiptarëve, tha Basha në intervistën e tij.
