Komisioni gjerman për vaksinat në Berlin, ka njoftuar se AstraZeneca/Oxford nuk duhet t’ju jepet personave mbi 65 vjeç. Autoriteti shëndetësor kryesor në vend, STIKO, që operon pranë institutit “Robert Koch”, ka zbuluar se nuk ka të dhëna të mjaftueshme mbi efektshmërinë e kësaj vaksine në fashat moshore mbi 65 vjeç.
Për shkak të numrit të kufizuar të pjesëmarrësve në studim të kësaj fashe moshore, u shprehen ata, është e pamundur të arrish në përfundime për efektet e vaksinës në këto grupmosha, ndaj STIKO e rekomandon atë vetëm për fashat 18-64 vjeç.
Pas këtij njofrimi ka reaguar edhe AstraZeneca, e cila njofton se të gjitha analizat e fundit të studimeve klinike, për efektshmërinë e vaksinës AstraZeneca/Oxford, kanë treguar se ato janë të efektshme edhe për fashat moshore mbi 65 vjeç.
Debati mbi efektshmërinë e vaksinës AstraZeneca/Oxford, vjen në një çast kur Bashkimi Evropian dhe AstraZeneca, kanë pasur mosmarrëveshje për dorëzimet e vaksinave anti-covid.
Pak kohë më parë, AstraZeneca njoftoi BE-në se nuk mund ta furnizonte me të gjitha dozat e porositura, për shkak të sfidave të prodhimit, ndërkohë që BE-ja reagoi ashpër, duke e quajtur të papranueshme këtë gjë dhe sugjeruar që prodhuesi i ilaçeve të gjente formën dhe të rrite prodhimin.
