Ka pushtuar faqet e para të gazetave në Greqi e në Shqipëri, rasti i Klodiana Celo Pavlidou-t, e cila ditën e djeshme goditi me një breshëri plumbi babanë e fëmijës, i cili, në shumicën e rasteve, cilësohet prej medieve si ish bashkëshorti i saj, apo si ish i dashuri.
Vetë Klodiana, në faqen e saj publike në fejsbuk, teksa u lutet gjykatave greke t’ia kthejnë fëmijën dhe përmend vazhdimisht padrejtësinë e bërë karshi saj, blerjen e tyre prej babait biologjik të së bijës, e cilëson atë si ish-përdhunuesin e saj, i cili, bashkë me të shoqen angleze, po përpiqen t’i vrasin të bijën.
“Dhe historia përsëritet me time bije, e cila u mor prej përdhunuesit tim grek dhe gruas së tij monstër kur qe 8 vjece, dhe që prej atëherë e deri më tani që ajo është 13, unë nuk e kam parë më”, shkruan në një nga postimet e saj Klodiana.
“Sepse ime bijë Melina, tani 12 vjeçe, u hoq nga krahët e mi kur ishte 7 vjeçe, në janar të 2016-s, prej rrëmbyesit të saj, babait të saj biologjik dhe gruas së tij. Ata i japin asaj ilace dhe e shpien në koma. Hera e vetme kur jam informuar për një gjë të tillë, ka qenë kur ata e shpunë atë në spitalin Mitera më 8-6-2016”, thotë ajo në një tjetër postim.
Kujtojmë që sipas medieve greke cifti ka qenë i lidhur, lidhje nga e cila ka lindur një vajzë aktualisht 13 vjeçare, dhe se kanë pasur mosmarrëveshje për kujdestarinë e saj, të cilën gjykatat greke ia kishin besuar babait të saj biologjik.
