Është tejet interesante të vëresh se çfarë ndodhi me shfaqen e parë në TKOB pas restaurimit, ku të pranishëm për të përformuar përpara publikut qenë edhe artistët me famë botërore Ermonela Jaho dhe Placido Domingo.
Pak po e sigurt, kësaj here, nuk qenë të paktë ata njerëz që kërkuan me ngulm ftesa e bileta për të qenë të pranishëm në atë sallë (unë e para), të cilët dolën duarbosh e të zhgënjyer, pikërisht në atë dimension që presupozohet ta përbashkojë një shoqëri e jo ta ndajë, që është prania në art, sidomos kur siparet rihapen rishtazi pas një kohe të gjatë.
Të thënat poshtë e përpjetë rrëfenin se të gjitha biletat i kishte përvetësuar Kryeministri/a dhe se do të shpërnaheshin (ne formën e ftesave) sipas orientimeve të kryeministrit, duke përjashtuar mundësinë e shitjes dhe praninë e publikut të thjeshtë që e do artin vërtet, (duke u hapur udhë kështu edhe thashethemeve për qoka politike).
Ndërkaq, ministrja Margariti këmbëngul që TKOB-i iu kthye publikut. Dhe pyetja që kam unë është kujt publiku, atij të qokave që i shkuan ftesat, apo këtij që u përjashtua nga të blerit bileta? Pse duhet ky i fundit ta frekuentojë nesër pasnesër atë teatër, duke e mbajtur në këmbë përmes biletave, kur në hapjen e tij e penguan të ishte i pranishëm? Apo mos TKOB është pasuri vetëm e kryeministrisë dhe ministrisë së Kulturës, e ne të tjerët nuk duhet të përzihemi?
“Epo Galatë kështu bëhen”, do më thotë ndokush. Po, po, kështu bëhen me ftesa, por 1) ftesat nuk i përvetëson Kryeministria dhe ministria e Kulturës, dhe 2) të ftuarit nuk zënë 100 % të kapacitetit të vendeve, se s’martojnë vëllanë, por maksimuni 50%, duke i lënë vendin që i takon edhe publikut artdashës, që do ta shikojë atë shfaqje si në të gjithë dynjanë, duke blerë një copë biletë.
Ai Teatër mbahet me taksat e publikut (apo e kanë privatizuar dhe nuk dimë gjë?!), dhe, sa për dijeni, marketimimin më të mirë artit ia bën publiku, ai i thjeshti, që thur ëndrra divanit të vet, e që prania në një “natë gala” i duket mrekulli. Por… iku. Tani TKOB i ka hapur dyert për të gjithë, dhe, oburra, blini ndonje biletë, të arkëtoni ndonjë para!
