Autoriteti Rrugor ka njoftuar ditën e sotme se punimet në sheshin Shqiponja kanë përfunduar, dhe se që prej ditës së nesërme, të gjitha tunelet aty do të jenë funksionale për publikun.
Duke filluar që nga data 4, thuhet në njoftimin e ARRSH-së, në orën 00.00, me ndërtimin e të gjitha galerive, trafiku do vijojë sipas lëvizjes përfundimtare parashikuar në projekt.
Njoftimi i plot ëi ARRSH-s ë
Në kantierin e punimeve te Sheshi Shqiponja ka përfunduar ndërtimi i të gjitha galerive (tuneleve) dhe do të hapet për qarkullimin e automjeteve edhe Galeria Nr. 5.
Duke filluar nga data 04.09.2021, ora 00:00, me ndërtimin e të gjitha galerive, trafiku do të vijojë sipas lëvizjes definitive të parashikuar në projekt ku:
– Lëvizja e automjeteve nga autostrada (Durrës-Tiranë) në drejtim të rrugës “Dritan Hoxha” (Laprakë) dhe anasjelltas do të realizohet drejt në nivelin 0 të parashikuar në projekt.
– Lëvizja e automjeteve që vijnë nga autostrada (Durrës-Tiranë) në drejtim të Unazës së Madhe do të realizohet nëpërmjet Galerisë Nr. 5.
– Dalja nga Tirana për mjetet që vijnë nga Unaza e Madhe drejt autostradës do të realizohet nëpërmjet Galerisë Nr.3
– Dalja nga Tirana për mjetet që vijnë nga pjesa veriore (ish-kombinati, rruga “Josif Pashko”) drejt autostradës do të realizohet nëpërmjet Galerisë Nr. 4.
