Është shtyrë me dy javë nisja e vitit të ri shkollor 2021-2022 dhe tashmë, nga data 13 shtator që ishte njoftuar, nis më datë 27 shtator.
Lajmin e ka bërë të ditur vetë ministrja e Arsimit Evis Kushi, e cila përmes një deklarate për mediat, ka njoftuar se kjo shtyrje, lidhej me nevojat e përmbushjes së boshllëqeve të krijuara nga viti i saposhkuar akademik, për të cilat nuk mjaftonte aq kohë sa qe lënë në dispozicion.
Kushi tha se kjo shtyrje qe bërë pas ardhjes së kërkesave të shumta nga stafi mësimor dhe nga prindërit, dhe se është një shtyrje e mirëmenduar sa u takon koordinimit të orëve të viti të ri akademik, mbyllja e së cilit gjithashtu do të shtyhet.
Për arsimin bazë, nga klasa e parë, në klasën e nëntë, tha Kushi, mbyllja shtyhet nga data 8 në datën 17 qershor 2022. Për arsimin e mesëm të lartë, klasat e dhjeta dhe të njëmbëdhjeta, mbyllja shtyhet nga data 15 në 24 qershor 2022.
Kushi sqaroi gjithashtu, se për të tërë prindërit që kjo gjë sillte shqetësim, shkolla do të jetë e hapur me orar të plotë që nga data 1 shtator, dhe se veç mësimit plotësues qe menduar edhe pasja e një programi aktivitetesh sportive e kulturore, por se zyrtarisht, viti akademik, nis më datë 27 shtator.
Dua të theksoj për të tërë ata prindër që me të drejtë mund të shqetësohen nga ky vendim, se shkolla do të jetë e hapur që më datën 1 shtator, dhe mësuesit do të jenë aty me kohë të plotë. Gjatë kësaj periudhe, do të zhvillohet jo vetëm mësimi plotësues, por ne do të kërkojmë nga të gjitha shkollat, që të hartojnë një program të detajuar veprimtarish, sportive, argëtuese, apo artistike-kulturore, në mënyrë që nxënësit, ata që dëshirojnë të shkojnë në shkollë gjatë muajit shtator, të angazhohen në mënyrë aktive në këto veprimtari. E përsëris edhe njëherë. Nxënësit nuk janë të detyruar të shkojnë çdo ditë në shkollë, ndërsa mësuesit dhe të gjitha stafet shkollore janë të detyruar dhe kanë përgjegjësinë jo vetëm t’i mirëpresin nxënësit, por edhe të respektojnë dhe të zbatojnë me përpikmëri të gjitha udhëzimet dhe programet që do hartohen për këtë periudhë, si dhe të njoftojnë rregullisht prindërit, për programin e detajuar të veprimtarive. Ju sigurojmë që ne si ministri me të gjitha strukturat, do të marrim të gjitha masat, për të garantuar një vit të ri të suksesshëm, përfundoi ministrja e Arsimit Evis Kushi.
