Pas deklaratës së ambasadores Yuri Kim, e cila, pas takimit me kreun e PD-së Basha, u shpreh para gazetarëve se do qe ironike për PD-në, nëse ajo do të hante bar për hir të interesave të një njeriu, ka reaguar edhe lideri historik i Partisë Demokratike Sali Berisha.
Në një status të tijin në FB, Berisha e cilëson deklaratën e ambasadores Kim si një dhunim flagrant të misionit të saj.
Sot ambasadorja e SHBA Yuri Kim, shkruan Berisha, me një deklaratë fyese për çdo demokrat dhe shqiptar, duke iu përmendur barin, në dhunim flagrant të misionit te saj, i kërkoi Kryetarit të PD qe Sali Berisha të mos futet në parlamentin e ardhshëm. Lidhur me këto, deklaroj sa vijon:
Asnjë shpifje, trillim apo sajim, nuk mund të pengojë kurrë Sali Berishën të përmbushe misionin e tij të besuar nga zgjedhësit shqiptarë në mbrojtje të interesit kombëtar dhe publik të shqiptarëve.
Që nga data 19 maj 2021 dhe deri sot pas vendimit të Sekretarit Blinken, të bazuar në lobimin korruptiv të Edi Rames dhe George Soros, armik i demokracisë së shqiptarëve dhe shpifjet e tyre, unë i kam kërkuar dhe i kërkoj Sekretarit Blinken të publikoje çdo fakt, dokument apo provë, që ai ose kushdo tjeter mbi tokë, disponon për të faktuar ato që ka shkruar në vendimin e tij. Por deri sot nuk është publikuar asnjë provë-dokumet apo fakt, vetëm e vetëm se ato nuk ekzistojnë. Për të gjitha këto, unë kam njoftuar se kam paditur Sekretarin Blinken për shpifje në Gjykatën Korreksionale të Parisit.
Deri sot, Departamenti i Shtetit me zëdhenesin e tij, ka informuar se Sekretari Blinken, vendimin e ka të bazuar në raporte të NGO-ve lokale, rajonale dhe ndërkombetare, raportet e mediave dhe raportet investigative antikorrupsion të qeverisë shqiptare.
Domethenë, vendimi i Sekretarit Blinken, është bazuar në raportet e armiqëve të mi, NGO të kontrolluara nga George Soros, dhe raportet e mediave të kontrolluara nga qeveria dhe raportet sekrete të Edvin Rames, të papublikuara kurrë në Shqipëri.
Duke shprehur bindjen se vendimi është një abuzim i pastër me ligjin e Kongresit të SHBA, përdorimin e tij si armë kundër kundërshtarëve politikë të multimilardierit George Soros dhe mikut të tij të ngushte Edi Rama, unë, pavarësisht nga këto, përsëri ftoj Sekretarin Blinken t’i bëjë të gjitha publike. Përveç këtyre, e ftoj Sekretarin e Shtetit të ndikojë tek Edi Rama, që të votojmë në parlament ligjin e vetingut të politikanëve.
Une dua t’i rikujtoj Zonjes ambasadore, se ke gabuar rëndë me barin që iu përmende demokratëve. Në këtë kontekst, shprehja juaj se PD nuk mund të haje bar, është një fyerje për çdo demokrat dhe për çdo shqiptar, të cilët, citate të ngjashme i kanë dëgjuar vetëm në diktaturë apo nga raciste albanofobe.
Së fundi, nuk e di nëse takimi i sotëm i Zj. ambasadore Kim, ka ndonje nxitje nga denoncimi im i marrëveshjes së dyshimtë që u njoftua se u arrit në prani dhe me nxitjen tuaj, midis Kryetares së KLGJ, Llagami dhe Instututit East Ëest, që sipas burimeve amerikane drejtohet nga Delina Fico. Duke ju kërkuar mundësisht të beni transparente këtë marrëveshje, ju siguroj se sikundër deri sot, do të denoncoj çdo afere të dyshimte nga cilido dhe pa asnje hezitim.
Shqiptarët jane njerëz të lirë dhe me dinjitet, që nuk meritojnë bar, por transparencë!
