Në një bashkëbisedim ditën e sotme me gazëtarët, nga selia e Partisë Socialiste, Rama ka komentuar të aq diskutuarat listat e deputetëve, me të cilat dy partitë hyjnë në garë për të fituar dhe përfaqësuar Parlamentin 2021-2025.
Partia Socialiste, u shpreh Rama, e mishëron si kurrë më parë, karakterin e vetë shoqërisë. Ne kemi një skuadër që shkon përtej Partisë Socialiste dhe që reflekton fuqinë tonë të vetëndryshimit, e cila është pika e parë e manualit të drejtimit të PS, që lindi nga një fuqi vetëndryshimi në kushte historike dramatike dhe që, nën drejtimin e Fatos Nanos, e pati pikëreferimi vetëndryshimin. Gjatë gjithë periudhës së drejtimit tim, jam përpjekur ta gdhend dhe ta bëj më të thellë këtë bindje, dhe jam i bindur që kjo është e vetmja mënyrë për një parti politike, për t’i rezistuar kohës, për të qenë konkurente dhe për të mos u kthyer në një forcë që rrezaton vetëm vetveten dhe nuk rrezaton shoqërinë.
Ndërkohë, vazhdoi Rama, skuadra e Partisë Demokratike është… është… është… phhh zhgënjyese dhe për mua. Unë nuk besoj që ky ishte maksimumi që mund të bënte PD-ja, pavarësisht situatës absolutisht të vështirë ku ndodhet, për shkak të një lidershipi pa karakter, pa vizion pa forcë, sepse nuk besoj që rrethi, perimetri i influencës së PD-së, të jetë aq i ngushtë, dhe që ajo të mos ketë mundësi të ofrojë më shumë se sa kaq.
Pra nëse lista e PS është fuqia e vetë ndryshimit, lista e PD-së është afirmimi i fosilizimit.
