Një tjetër libër vjen në shqip prej Murakamit. Ai është “1Q84” (libri i parë), dhe e fton lexuesin të njohë e të zhbirilojë veten, teksa përhumbet mes reales e magjikes së rrëfyer në tekst.
Novela e botuar në tri pjesë, rrëfen historinë e një gruaje quajtur Aomame, e cila nis e vë re disa ndryshime të çuditshme tek ndodhin në botë. Në përpjekje për të kuptuar diçka më shumë prej tyre, ç’është reale dhe çfarë jo, ajo i drejtohet një kulti fetar dhe dashurisë së kohërave të fëmijërisë, Tengos.
Jemi në një botë distopike, ngjarjet e së cilës zhvillohen përgjatë një viti, 1984-s, ndarë në stinë të ndryshme të tij, si për të na sjellë edhe lulëzimin e vyshkjen e shpirtit, ku pjesa e parë shtrihet mes prillit e qershorit, e dyta nga korriku në shtator, dhe e treta nga tetori në dhjetor.
Seksualiteti, magjikja, misteri, ajo frymë e patjetërsueshme e Tokios ku ndërthuren pashmangshmërisht modernia me tradicionalen, e bëjnë “1Q84” një libër jo vetëm të papërsëritshëm në korpusin e leximeve, por edhe të domosdoshëm për të kuptuar sa më mirë, ato dilemma të së përditshmes, që gërma Q i simbolizon qysh në titull.
Një grua e çuditshme me emrin Aomame, e cila qysh në moshën dhjetëvjeçare, kohë kur e ka provuar dhe e ka humbur njëherësh ndjesinë dashurore, është kthyer në një qenie të ftohtë. Për arsye që mund të duken të përligjura në libër, ajo ka mes të tjerash edhe profesionin e vrasëses së burrave që dhunojnë gratë e tyre. Aomame takon rastësisht një vajzë të re të shkujdesur që punon police dhe do të nisin shpejt bashkë ca aventura të thekshme seksi me burra që i ndeshin bareve të Tokios. Diku tjetër, Tengo, një shkrimtar i ri e me një histori familjare të trishtë, do të mbetet peng i rishkrimit të librit të një adoleshenteje, Fuka-Erit, dhe prej penës së tij libri jo vetëm do të marrë formë, por edhe çmimin më të madh për të rinj. Por çfarë ka pas gjithë këtyre ngjarjeve? Loja e Murakamit me elemente të realizmit magjik dhe fantazisë së njohur të tij, i kthen ato në erëza që do t’ia ruajnë shijen leximit deri në fund. Qiej me dy hëna, dhi që nxjerrin nga goja Njerëz të vegjël, vajza që mendojnë bukur e flasin pak, giljakë që e urrejnë rrugën automobilistike, janë të pranishëm kudo si shenja të patjetërsueshme dhe na çojnë në shtresime joshëse dhe në padurimin për vazhdimit të tij. “1Q84” është një rrëfim që të deh, që luan me elementet dystopike të rimarra nga “Viti 1984” i Orëell-it, ku Q simbolizon pyetjet e së përditshmes sonë së beftë dhe domethënëse. (KRITIKA)
