Në intervistën e dhënë sot në mbrëmje në studion e “Opinion”, Fatos Nano rrëfeu se Berisha qe marrë personalisht me burgimin e tij, dhe se, me vrasjen e 4 vetave më 21 janar, tregoi që kishte humbur çdo cilësi politikani.
Do përpiqem të jem i drejtë dhe i sinqertë, tha ai. Sali Berisha hyri në politikë si intelektual. Dhe si intelektual humanist madje. Mjek kardiolog. Në momentin që mori drejtimin e partisë demokratike, ai u bë politikan. E them këtë gjë, sepse intelektuali dhe politikani me kalimin e kohës i zënë vendin njëri-tjetrit. Janë të rralla rastet kur politikani mbetet aq intelektual sa duhet.
Më pas ai ka mbikqyrur, që nga ideja e parë që e hodhi vet, deri në realizim, atëherë kur ra shteti në ’97-n, burgosjen dhe mbajtjen time në burg. Është marrë in personam me këtë gjë. Berisha mund të thotë shumë gjëra, por unë kam të dhënat e kohës, të dhëna nga njerëzit që kanë qenë të pranishëm në zyrën e tij, që ai është marrë in personam me mbajtjen time në burg. Dhe me burgosjen e liderit të opozitës, ai u kthye në kafshë politike. Kjo në kuptimin që politikanët janë kafshë politike dhe kur marrin vendime të tilla, nuk mund të mos u thuash kafshë politike.
Në 21 janar, ai mbikqyri, drejtoi, u përpoq të mbulonte vrasen e 4 njerëzve të pafajshëm, përballë një proteste massive popullore. Janë të njohura nga shumë njerëz faktet për këtë gjë, e veçanërisht sjellja e Berishës përballë faktit, por unë jam i detyruat të them që më 21 janar 2011, Sali Berisha poshoi së qeni politikan,, dhe mbeti… pjesa tjetër. Që po e dëshmon tani me qytetarin dixhital.
Roli i Berishës në politikën shqiptare, ka qenë në vlerësimin tim, konfliktual, pra në periudhën e parë, ai pati, krijoi dhe ushtroi autoritetin e marrjes se vendimeve të mëdha, si në drejtim të krijimit të institucioneve te reja demokratike, ashtu edhe në ekonomi. Ndërkohë, po ta ndjekësh me këtë synim, ai ka qenë i përfshirë personalisht në vendimet e mëdha, që do të thotë i gatuante vendimet e mëdha sipas kuptimit të tij. Gjithka në kuptimin e tij duhej të kalonte përmes tij dhe në lënien mënjantë të atyre që e kundërshtonin. Ndërkohë, ai erdhi duke e thelluar sjelljen, dhe kuptimin dhe veprimin, e njeriut të konfliktit, dhe njeriu që e ka ngulur konfliktin e që edhe sot e kësaj dite nuk po largohet dot nga politika shqiptare, është Sali Berisha. Dhe di vetëm mënyra konfliktuale për të realizuar ambiciet e veta. Është e pamundur të kesh një proces paqësor të shtirë në kohë, për të arritur, synime të mëdha, me kosto më të ulëta me Sali Berishën.
Berisha kuptoi që bashkëpunimi me qeverinë e defaktorizonte si opozitë, dhe qysh nga shkurti i 2003-shit, rinisi betejën e tij tradicionale në parlament, derisa u kthye tek bojkotet, etj, etj. Kështu që Berisha ka qenë dhe është rritur si politikan i konfliktit.
