Pyetjes së MetropolPost-it, se sa doza vaksinash përmban brenda pakoja e vogël që pamë në transmetim të drejtëpërdrejtë të futej në frigoriferin e ISHP-së, mjeku Erion Dasho i përgjigjet se shifra e dhënë prej kryeministrit Rama dhe ministres Manastriliu, tingëllon disi e çuditshme. Si pas tij dhe përllogaritjeve të kryera nisur nga mënyra si i transporton vaksinat Pfizer, i bie që 39 flakonë, të mos kenë ardhur me kutinë frigoriferike që pamë të zbriste nga avioni, por në tjetër mënyrë.
Njësia bazë e transportit të vaksinave nga ana e kompanisë Pfizer, sqaron mjeku Dasho, është paketa ose kutia prej kartoni, e cila mban 195 flakone vaksinash. Kjo sasi është përllogaritur të vaksinojë 975 persona, ose 5 persona për çdo flakon. Me qëllim që të mundësohet transporti i sigurt, kompania Pfizer ka ndërtuar një kuti plastike termike, të aftë të ruajë temperaturën midis -60⁰C dhe -80⁰C. Kjo kuti plastike mund të mbajë nga 1 deri 5 kuti kartoni të ngjashme me atë që pamë në ekran. Pra sa herë vjen një kuti plastike e Pfizer, ajo mund të ketë në brendësi të saj nga një deri në pesë kuti kartoni, të cilat kanë në brendësi të tyre një sasi prej 195, 390, 585, 780 ose 975 flakonë. Një flakon shërben për të vaksinuar pesë persona, pra një kuti plastike e Pfizer sjell mjaftueshëm vaksina për të vaksinuar 975, 1950, 2925, 3900 apo 4875 persona.
Shifra e parë prej 975 dozash nuk lë vend për dyshime. Duhet të ketë ardhur një karton brenda një kutie plastike dhe ai i korrespondon 195 flakonëve të mjaftueshëm për të vaksinuar 975 persona. Ndërsa shifra prej 1170 dozash është paksa e çuditshme, sepse përkon me një kuti kartoni që përmban 195 flakonë dhe 39 flakonëve që duhet të kenë ardhur të hapur. Kjo sasi, siç e thashë, nuk përputhet me sasitë që përdor kompania Pfizer për transportim të sigurt.
Në këto kushte, Ministria e Shëndetësisë duhet të sqarojë urgjentisht dy pika. Së pari, si kanë ardhur 39 flakonet e veçuara të vaksinës, ku po ruhen dhe si do të administrohen ato? Së dyti, si do të ruhen dhe administrohen 975 dozat e tjera të cilat kanë ardhur në një mënyrë relativisht më të sigurt? Nëse kutia e kartonit nxirret prej kutisë plastike, ajo ose duhet të mbahet në një frigorifer që mundëson ruajtjen në temperaturë -70⁰C ose duhet të kalohet në temperaturë 2 deri 8⁰C dhe vaksinat brenda saj duhet të përdoren brenda 5 ditëve. Gjatë kësaj periudhe ato nuk mund të rikalohen sërish në ngrirje pasi efektiviteti i tyre humbet.
Shqiptarët kanë të drejtë të mësojnë se si janë zbatuar parimet e sigurisë medikamentoze dhe farmakovigjilencës, në kushtet e fushatës së vaksinimit.
©MetropolPost.al
