Në konferencën për shtyp mbajtur sot nga Komiteti Teknik i Ekspertëve mbi situatën Covid në vend, në pasqyrën e bërë për situatën dy javore, ministrja Manastriliu theksoi se ka jo vetëm një rritje të incidencës dyjavore, por janë shtuar edhe bashkitë e prekura nga virusi, të cilat nga 44 që ishin, janë bërë 50.
Lidhur me masat parandaluese për përhapjen e koronavirusit, Manastriliu theksoi se mbetet në fuqi kufi ndalim-qarkullimi nga ora 22.00 e mbrëmjes deri në 6.00 të mëngjesit, mësimi onlajn do të vazhdojë deri në një urdhër të dytë dhe fluturimet me Anglinë do jenë të pezulluara deri më 1 shkurt, kur do bëhet edhe rivlerësimi i radhës për situatën.
Ndërkaq, dr.Silva Bino shtoi se gjatë këtyre dy javëve qe vënë re edhe një shtim i të prekurëve nga 15-24 vjeç, grupmoshë kjo e pa vënë re më parë, e po ashtu njoftoi edhe se varianti anglez i virusit nuk ka mbërritur ende tek ne.
