Në konferencën për shtyp dhënë ditën e sotme me rastin e nisjes së vaksinimit anti-covid, ministrja e Shëndetësisë Ogerta Manastirliu ka sqaruar se si do të procedojë Plani Kombëtar i vaksinimit anti-kovid. Të parët që do vaksinohen, tha ajo, janë punonjësit e shëndetësisë, mjekët, infermierët, epidemiologët, punonjësit e urgjencave, por edhe brenda këtyre grupeve ka zëra më prioritarë, sepse në total numri i tyre shkon në 23 mijë. Do niset me mjekët që ofrojnë shërbime në spitalet covid, vaksinimi i të cilëve nis sot, më pas vijojnë ata të reanimacionit e kështu me radhë.
Ndër grupet prioritare janë të moshuarit, ata që ndodhen në shtëpinë e pleqve, ata me probleme të shumta shëndetësore, e më pas njerëzit mbi 75 vjeç, që aktualisht janë mbi 170 mijë.
Ia vlen të theksohet, veçoi Manastirliu, se ky proces nuk do të ndodhë vetëm në Tiranë, por do shtrihet në të tërë Shqipërinë, duke nisur nga Shkodra, Vlora e më tej. Vaksinimi sqaroi ajo, do të kryet me tërë elementët e nevojshëm të sigurisë, me plotësimin e formularit, kartën e vaksinimit, serinë e saj, datën kur bëhet vaksina e dozës së parë, datën e dozës së dytë që do t’i jepet individit, dhe ndërkohë që kemi përfundur nëpërmejt AKSHI-t, dy elementë të rëndësishëm të ruajtjes së informacionit elektronik.
