Një burrë dhe një grua, anëtarë të stafit të ambasadës izraelite, janë qëlluar për vdekje jashtë Muzeut Hebre në qendër të Uashingtonit, ndërkkohë që janë plagosur edhe disa punonjës të tjerë.
Vrasësi fillimisht u ngatërrua me një dëshmitar të tronditur. Sipas CNN, burri shtirej si dëshmitar”, madje rojet e sigurisë i ofruan ujë, duke u përpjekur ta ngushëllonin. Më pas, vrasësi i dyshuar kishte kërkuar sigurimit të thërrisnin policinë, e kur mbërriti ajo, rreth 10 minuta më vonë, mori përgjegjësinë për aktin duke thënë: “E bëra, e bëra për Gazën. Çlironi Palestinën!”
Sipas Yechiel Leiter, ambasadorit të Izraelit në Shtetet e Bashkuara, dy personat e vrarë ishin gati të martoheshin: “Çifti i vrarë sonte ishin gati të fejoheshin. Ai kishte blerë një unazë këtë javë me qëllim që t’i propozonte të dashurës së tij në ditët e ardhshme në Jerusalem. Ata ishin një çift i bukur”.
Pas ngjarjes, Benjamin Netanyahu urdhëroi rritjen e sigurisë për ambasadat izraelite në mbarë botën, ndërsa presidenti amerikan Donald Trump ndërhyri duke e dënuar krimin e dyfishtë: “Këto vrasje të tmerrshme në Uashington, të bazuara padyshim në antisemitizëm, duhet të ndalen, TANI!” shkroi ai në platformën e tij Truth. “Urrejtja dhe radikalizmi nuk kanë vend në Shtetet e Bashkuara,” shtoi ai.
Fjalë ngushëllimi edhe nga presidenti izraelit Isaac Herzog: “Jam i shkatërruar nga skenat në Uashington. Ky është një akt i neveritshëm urrejtjeje, antisemitizmi, i cili ka rezultuar me vdekjen e dy punonjësve të rinj të ambasadës izraelite. I dërgoj mbështetjen time të plotë ambasadorit dhe të gjithë stafit të ambasadës në të gjithë komunitetin e Shteteve të Bashkuara dhe Izraelit”.
