Trump: “TSMC tajvaneze do të investojë 100 miliardë dollarë në SHBA. Do prodhojmë çipat më të fuqishëm…”

Gjigandi i çipëve Taiwan Semiconductor Manufacturing Co. planifikon të investojë 100 miliardë dollarë në Shtetet e Bashkuara, deklaroi sot,  të hënën, Presidenti Donald Trump, krahas 65 miliardë dollarëve në investime që kompania kishte njoftuar më parë.

TSMC, prodhuesi më i madh në botë i gjysmëpërçuesve, prodhon çipa për kompani duke përfshirë Apple, Intel dhe Nvidia.
 
Kompania kishte filluar ndërkohë ndërtimin e tri fabrikave në Arizona, pasi administrata Biden ofroi miliarda subvencione. 

Fabrika e saj e parë në Arizona ka filluar prodhimin masiv të çipave të saj 4 nanometër.

Trump, i cili u shfaq me shefin ekzekutiv të TSMC, C. C. Wei në Shtëpinë e Bardhë, e quajti atë një "lëvizje të jashtëzakonshme" dhe "një çështje sigurie ekonomike".

“Gjysmëpërçuesit janë shtylla kurrizore e ekonomisë së shekullit të 21-të. Dhe realisht, pa gjysmëpërçuesit, nuk ka ekonomi”, deklaroi Trump. “Duke fuqizuar çdo gjë, nga AI te automobilat e deri te prodhimi i avancuar, ne duhet të jemi në gjendje të ndërtojmë çipat dhe gjysmëpërçuesit që na duhen pikërisht këtu, në fabrikat amerikane, me aftësi amerikane dhe punë amerikane.”