“Ndërsa isha në gojën e balenës, m’u kujtua përralla e Kolodit”, deklaroi 24-vjeçari venezuelian, që po transportonte paketa në bregun jugor të Kilit.
Historia duket se i shëmbëllen përrallës më të famshme të Karlo Kolodit, “Aventurat e Pinokut”, dhe është pikërisht e njëjta gjë ajo që i ndodhi Adrián Simancas, një djaloshi 24-vjeçar venezuelian, i cili ishte po lundronte me një kanoe të fryrë, kur u gëlltit nga një balenë dhe më pas u vërvit jashtë pas pas disa sekondave. Situata duket e pabesueshme, aq sa po të mos kishte ekzistuar videoja, vështirë se do ta besonte njeri.
Imazhet e regjistruara më 8 shkurt të 2025-s, e të publikuara mandej në rrjetet sociale, tregojnë pikërisht momentin kur balena del nga ujërat dhe, pasi e gëlltit djaloshin për disa sekonda, e pështyn sërish jashtë.
Aksidenti ndodhi në Punta Arenas, në jug ekstrem të Kilit, në ujërat e gjirit El Águila, dhe u filmua nga babai i të riut, i cili ishte dëshmitar i skenës.
Ankthi zgjati vetëm disa sekonda. “Kur isha brenda, m’u kujtua Pinoku, që gjithashtu u gëlltit nga një balenë,” shpjegoi Simancas për gazetën spanjolle El País. “Ishte surprizë kur balena m’u afrua. Fillimisht mendova se më kishte gëlltitur plotësisht, megjithëse nuk isha i sigurt se çfarë ishte, pastaj, kur u ktheva në sipërfaqe, kuptova se ishte një balenë. E dija që nuk kishte rrezik të madh, përveç nëse fillonte të kërcente ose të hidhte babanë nga varka, sepse atëherë do të kishim shumë vështirësi të ktheheshim në bord.”
Balenat e mëdha që mund të peshojnë deri në 48 tonë, e në rastin e femrave janë afërsisht 19 metra në gjatësi, ushqehen me plankton, bimë e peshq. Ezofagu i tyre është shumë i ngushtë që trupi i njeriut të mbërrijë në stomak. Për më tepër, këto kafshë rrallë sulmojnë njerëzit, dhe dallohen për faktin se janë një nga speciet që udhëtojnë në distancat më të gjata në botë.
