“Amerikanët meritojnë transparencë dhe të vërtetën”. Ka qenë kjo deklarata e presidentit amerikan të sapozgjedhur Trump, i cili ka nënshkruar një dekret për heqjen e sekretit të dokumenteve që kanë të bëjnë me John F. Kennedy dhe Martin Luther King-un.
“Gjithçka do të zbulohet. Njerëzit e kanë pritur këtë për vite, dekada,” shpjegoi Trump teksa urdhëroi deklasifikimin e dokumenteve të qeverisë amerikane, për vrasjet e Presidentit Kennedy në 1963-in, vëllait të tij Robert në 1968-in, si dhe atë të udhëheqësit të të drejtave civile Martin Luther King Jr në të njëjtin vit.
“Është në interesin kombëtar, që të publikojmë dosjet e vrasjeve pa vonesë”, thuhet në dispozitë, ku Trumpi thekson se të dish se çfarë ka ndodhur, është “në interesin publik”.
Brenda 15 ditëve nga nënshkrimi i dekretit, presidenti do të ndërmarrë një plan të detajuar për publikimin e dokumenteve në lidhje me vdekjen e JFK, kurse dosjet për Robert F. Kennedy dhe Martin Luther King, do të zgjasin më shumë: plani i publikimit do t’i paraqitet Trumpit brenda 45 ditëve.
Trump nënshkroi gjithashtu edhe një dekret për inteligjencën artificiale e për ta bërë Amerikën kryeqytet të kripto-botës.
Vrasjet e Kennedy dhe Martin Luther King
Presidenti Kennedy u vra në Dallas në nëntor 1963. Policia arrestoi Lee Harvey Oswaldin si të dyshuar, i cili vdiq dy ditë me pas nga një e shtënë me armë zjarri nga Jack Ruby. Një zinxhir ngjarjesh që nxitën teoritë e konspiracionit.
Robert F. Kennedy u vra në vitin 1968 në Los Anxhelos pasi fitoi zgjedhjet presidenciale në Kaliforni. Sulmuesi ishte Sirhan Sirhan, të cilit në vitin 2023, pas 55 vitesh, burg, iu refuzua kërkesa për lirim me kusht, sepse ende konsiderohej shumë i rrezikshëm.
Në vitin 1968 Martin Luther King u vra gjithashtu nga James Earl Ray, i cili pranoi se ishte vrasësi dhe më pas hoqi dorë, duke u përpjekur të lirohej deri sa vdiq më 1998-n.
