Një video e bërë virale ditën e djeshme, ku shihet qartazi kreu i operatorëve turistikë Vlorë, Vasil Bedinaj, njëkohësisht edhe kreu i “Regina Group”, teksa godet me shpullë një zotëri, ka rihapur edhe njëherë diskutimin mbi mikrpitjen apo cilësinë e turizmit detar në vend, sidomos në Vlorë e Sarandë, ku jo rrallë herë ka pasur episode sherri, apo të rrahura paq të turistëve prej pronarëve.
Pas bërjes virale të videos ditën e djeshme, Vasil Bedinaj, së bashku me njeriun të cilin e goditi me shpullë, janë shfaqur sërish së bashku në një video, duke kërkuar ndjesë publike për aktin e kryer, e duke theksuar se ata ishin të dy qytetarë dhe jo njëri pronar e tjetri turist.
Sipas Bedinaj, ngjarja ka ndodhur një muaj më parë, është sqaruar 30 minuta pasi ndodhi dhe të dy ata kanë bizneset pranë dhe bashkëpunojnë në turizëm.
‘Të nderuar bashkëqytetarë, ju që keni lexuar lajme nëpër portale” shprehet Bedinaj. “Ne jemi dy komshinj, të dy pronarë që shërbejmë për turizmin nga mëngjesi deri në darkë. Dhe patjetër dhe ne me mish jemi dhe me gjak. Kemi gabuar. Dhe për këtë ju kërkojmë ndjesë. E kemi kuptuar pas 30 minutash dhe kjo është një histori që ka ndodhur para 1 muaji e gjysëm. Nuk ka lidhje me ditën e sotme, ne sot po ju shërbejmë të gjithë atyre që zgjedhin Vlorën si destinacion turistik. Që tashmë e dinë që është një qytet turistik. Unë dhe komshiu im këtu në zonën më të mrekullueshme të Radhimës bëjmë të pamundurën nga mëngjesi deri në darkë për tu shërbyer të gjithëve dhe për të krijuar një imazh pozitiv.
Edhe një herë ju kërkojmë ndjesë nga ajo që keni parë sot nga portale dashakeqe, qënë radhë të parë dëmtojnë imazhin e një qyteti turistik, por edhe tonin personal që të gjithë gabojmë dhe të gjithë i kërkojmë falje njëri tjetrit. Kjo është më kryesorja që ne vazhdojmë të punojmë për një qytet të bukur për një zonë turistike të bukur. Ka ndodhur diçka, i kemi kërkuar kemi përqafuar njëri tjetrin po atë ditë, para një muaji e gjysëm ky muhabet.
Më e rëndësishme për në është që të na kuptoni që jemi dy qytetarë dhe jo një pronar dhe një turist. Turistët i mbajmë si në pëllëmbë të dorës. Ju mirëpresim në hotelet e mia siç më quani, apo në Jet Skit ku të kaloni orë të mrekullueshme këtu në zonën e Radhimës. Ju përshëndesim dhe një herë ndjesë për atë që keni parë sot nga ata që nuk na duan të mirën në këtë qytet. Ju faleminderit’, tha biznesmeni Vasil Bedinaj.
