Claudine Gay drejtuesja e universitetit të Harvardit ka dhënë dorëheqjen pas debateve të gjata dhe akuzave për antisemitizëm dhe plagjiaturë.
Bijë e dy emigrantëve nga Haiti, 53 vjeçarja Claudinë Gay ishte gruaja e parë me ngjyrë në krye të universitetit më të famshëm në SHBA. Ajo e mori detyrën vetëm gjashtë muaj më parë dhe ishte gruaja e dytë që merrte drejtimin e Harvardit përgjatë historisë së tij, por e para me ngjyrë.
Dorëheqja e Gay i jep fund mandatit më të shkurtër në historinë shekullore të Harvardit, vë në dukje gazeta studentore Harvard Crimson.
Profesore e studimeve afrikano-amerikane, Claudine mori detyrën në korrik. Në dhjetor, me bekimin e bordit, ajo arriti fillimisht ta shpëtonte punën e saj pas dëshmisë së diskutueshme në Dhomën e Përfaqësuesve, ku pyetjes së kongresmenes republikane Elise Stefanik “a i cënon rregullat e Harvardit, genocidi kundër hebrenjëve”, ajo iu përgjigj “varet nga konteksti”, e pavarësisht presionit të donatorëve të rëndësishëm të Harvardit dhe hebrenjëve të diplomuar aty e me ndikim, pati mbështetjen e bordit.
Por polemikat mbi luftën Izrael-Hamas e polarizuan edhe më tej debatin, i cili, nga sa deklarojnë mediat botërore u nxit edhe prej mediave konservatore në vend, çka solli si akuza të mëtejshme ato të plagjiaturës. Artikujt e Claudinë botuar në 2001 e 2007, u përdorën si akuza për mos citimin e burive, ndërkohë që mandej akuzat vazhduan edhe me tezën e saj doktorale më 1997-n, ku pretendohet se janë gjetur të tilla problematika.
Gay është drejtuesja e dytë i një universiteti të “Ivy League” që është larguar prej detyrës javët e fundit. E pranishme në seancën dëgjimore në Kongres në dhjetor, së bashku me kolegen e Universitetit të Pensilvanisë, Elizabeth Magill, dhe Sally Kornbluth të MIT-it, tri drejtueset dukej se pranonin episodet e antisemitizmit dhe kërcënimet ndaj studentëve hebrenj pas 7 tetorit të Hamasit. E ndërsa Gay dhe Magill kanë janë larguar prej detyrës, Kornbluth vazhdon ta kryejë ende atë.
“Me emocion të madh, por me dashuri të madhe për Harvardin, po ju shkruaj për t’ju informuar se po jap dorëheqjen,” shkroi 53-vjeçarja, në letrën e dorëheqjes, duke shtuar se “ishte e frikshme të ishe subjekt i sulmeve dhe kërcënimeve personale të nxitura nga racizmi”.
