Në betejën e ashpër me koronën, ka humbur jetën edhe një prej mjekëve me sa duket më të dashur për ata që e kanë njohur, urologu Blendi Nini. Në rrjetin social Fejsbuk, një sërë njerëzish, figura të njohura publike ose jo, kanë shprehur trishtimin për largimin e mjekut Nini, në një moshë kaq të re.
Publicisti Erion Kristo: O vëlla, po pse ike? Na thave krahët! Ne prisnim fitoren tënde, po kjo gjëja e zezë të mori. Do na mungojë humori dhe e qeshura jote. Do i mungosh familjes, gruas dhe fëmijëve, prindërve të mrekullueshëm dhe motrës. Do i mungosh kolegëve dhe pacientëve. Do na mungojnë këshillat e tua. Mjekët e shkëlqyer që na rekomandoje. Po sa lojëra kemi bërë bashkë o vlla. Po sa herë i kthyem përmbys shtëpitë tona. Po të deshëm o vlla. Po ky virusi i poshtër na tmerroi. Është si bandë mongolësh në një fshat të pambrojtur o vëlla. Ka njerëz që nuk besojnë. As unë nuk besoja që do ikje. Lusnim Zotin përditë për ty, po nuk na dëgjoi. Të donte për vete. Doktor Bledi Nini ka ndërruar jetë. Nuk e besojmë dot. Ishe në lule të jetës vëlla. Fjalët nuk më vijnë më.
Gazetari Edmond Arizaj: Ike dhe ti Bled… Nuk do më presësh më me atë buzëqeshjen karakteristike: Hë Mond, prapë? Ti e di, ai veshi im kronik. Ndoshta spitali francez nuk ka për të qenë me as i njëjti në sytë e mi, kur të mos e lexoj me emrin Bledi Nini tek dera jote. Ishte kaq trishtues lajmi sot, kur ma dha Manjola. Dhe nuk e besoja, sa më shume lexoja. Nuk mundesha. E nuk kam turp Bled ta them se, për herë të parë pas 21 vjetësh, kam nxjerrë lot në publik. Për një njeri të mirë. Për një vlonjat të mirë. Për një mjek të talentuar dhe të ri, që e shkëputi dhunshëm nga jeta e familja kjo flamë e pabesë. E di, nuk ke si pushon në paqe, kur kishe plane, ëndrra, një jetë të gjithë për të jetuar. Por çfarë mund të bësh?! Kjo murtaje moderne nuk përzgjedh. Nuk ka frikë as nga mjekët. Ndoshta nuk do shkruajnë për ty vlla se ishe simbol i Tiranes, por ama me qindra e mijëra kanë kujtime prej duarve të tua. Edhe unë mes tyre, shoh perdite prej kaq vitesh punën estetike të duarve të tua, në një fytyrë familjare. Prandaj do jetë vështire të harrohesh…Tani, e kam kaq të vështirë të shkruaj lamtumirë…por, Lamtumirë Bled!
Kujtojmë që dita e djeshme, 24.11. 2020, ishte edhe dita me numrim më të lartë të jetëve të humbura prej covid-19. Sipas Ministrisë së Shëndetësisë, numri i të prekurëve ditorë ka mbërritur në 744, ndërkohë që humbet e jetëve janë 19 brenda ditës.
