E teksa shumë pensionistë mezi e kanë pritur datën e pensionit pas shtesës që kreu i qeverisë Rama tha se do të hynte në fuqi në datën 1 prill, në kuadër të Paketës së Rezistencës dhe ndihmës që shteti jep për ta, nuk kanë qenë të paktë ata pensionistë në Fier që nuk kanë pasur fatin ta prekin pensionin me dorë ditën e caktuar, për shkak se zyrat e pensioneve në këtë rreth, kanë deklaruar se nuk kanë pasur lekë mjaftueshëm.
E kisha sot pensionin, rrëfen një pensioniste për MetropolPost. Shkova që në mengjes. Më thanë eja në datën 5, të martën se nuk ka lekë. Pastaj mora vesh që pensionet po jepeshin. Shkova prapë tek zyra, tek Konferenca e Pezës, e më thanë që mbaruan lekët. U thashë po unë erdha në mëngjes, më thatë që s’ka para, pse s’me njoftuat që do jepeshin? Epo aq para na prunë, më thanë, rrëfen pensionistja, e cila, thotë se nuk e ka pensonin më të lartë se 130 mijë lekë të vjetra. Duan dhe bashkishe ato arkëtaret, thotë e mërzitur. U lënë pensionistët nga 1 mijë lekë të vjetra, që t’ua japin shpejt pensionin. Atyre ua japin. Mua jo, se nuk u lë bakshish, nuk më del.
Kujtojmë që kreu i qeverisë Rama njoftoi hyrjen në fuqi të një shumeje prej 30 mijë lekësh të vjetra për pensionistët që e kishin pensionin më të ulët se gjysma e pagës minimale në vend, shumë e cila, përtej dëshirës dhe mundësisë së Ramëse qeverisë së tij, do kalojë me gjasa edhe peripecitë e burokratëve nëpër zyrat e pensioneve, të cilëve, me gjasa u ka humbur edhe pika e fundit e humanizmit, përballë varfërisë dhe vështirësive ekonimike, me të cilat përballet mosha e tretë në Shqipëri.
