Kreu i qeverisë Rama, përgjatë debateve të shumta që bën me qytetarët në faqen e tij në FB, ka komentuar edhe situatën e protestave në vend, të cilat në gjykimin e tij janë të organizuara jo nga populli, por nga “manipulatorët e mirënjohur, që hedhin gurin e fshehin dorën, për të ndjellë njerëzit e mërzitur me situatën.
Teksa njëri prej komentuesve i thotë “Thirri mendjes se populli nuk është non grata po ka dalë për të drejtat e tyre që të mos fusi dorën askush në xhepin e tyre”, Rama i përgjet se “populli është fjalë shumë e madhe, e nuk janë as një mijë e as dy mijë e as dhjetë mijë, të tërhequr në rrugë pa arsye”.
Sa më poshtë përgjigjja e plotë e Ramës për komentuesin.
Populli është fjalë e madhe shumë, nuk janë as njëmijë as dymijë dhe as dhjetë mijë vetë po deshë, të tërhequr në rrugë nga njerëz pa arsye, të cilët nuk pranojnë faktet dhe shajnë e bëjnë thirrje për sherr! Sa për të drejtat, ato të siguroj që i di shumë mirë dhe i mbroj me të gjitha fuqitë, por kur një luftë prek xhepin, njeriu nuk i turret qeverisë me të shara, ndërkohë që qeveria paguan prej muajsh diferencën gjithnjë e më të madhe mes çmimit real të energjisë dhe çmimit në faturën e çdo familjeje! Kjo është e papranueshme dhe prandaj këtë s’e bën kurrë populli, po manipulatorët e mirënjohur, që hedhin gurin e fshehin dorën, duke nxjerrë nëpër rrugë fanatikët e tyre, për të ndjellë njerëz të mërzitur e të keqkuptuar me situatën! Këtë luftë që nuk e nisi Shqipëria, nuk e ndalon dot Shqiperia dhe nuk e di askush sa do të vazhdojë, duhet ta përballojmë të bashkuar me të vërtetat dhe me durim e dinjitet, sepse tragjedia e vërtetë është ajo që ndodh ne Ukrainë, ndërsa ne do t’ia dalim edhe kësaj, siç ia dolëm të tjerave më parë!
