Duket se sanksionet e Amerikës dhe Evropës nuk kanë qenë edhe aq sanksione të forta, përsa të dyja nuk kanë ndërmarrë masa që e prekin Rusinë në pikat e saj nevralgjike, e që me gjasa mund ta detyronin të tërhiqej, ose të zbehte paksa raprezaljet mbi Ukrainë. Sipas ekspertëve, gazi dhe sistemi i pagesës SWIFT janë dy prej pikave më delikate për Rusinë, të cilat në fakt, në sanksionet e ndërmarra si prej Evropës, ashtu edhe prej Amerikës, nuk u prekën. Por përse vallë?
Ekspertët thonë se përjashtimi i Rusisë prej sistemit SWIFT (rrjetit ndërkombëtar të pagesave) përmes të cilit komunikojnë dhe transferojnë para mbi 11 mijë institucione financiare në 200 vende, do të thotë që Rusia të humbasë hyrjen kryesore në tregjet financiare ndërkombëtare, duke paralizuar kështu shkëmbimet me Perëndimin. Por po sipas ekspertëve, një veprim i tillë do të penalizonte edhe vetë perëndimin, e më konkretisht ato vende perëndimore që kanë ekspozimin më të madh bankar ndaj Rusisë, si Italia, Franca dhe Austria, ku Roma dhe Parisi kanë nga 25 miliardë euro, dhe Austria 17 miliardë, çka i nxit ato të ngurrojnë në marrjen e një vendimi të tillë, i cili, sipas ekspertëve, do ta shtynte edhe Moskën përfundimisht në krahët e Kinës.
Deri më tani vendet perëndimore kanë goditur vetëm dy banka të vogla që operojnë në Donbas, por që së bashku mbulojnë rreth 5% të tregut rus. Bankat më të rëndësishme të vendit janë shtetëroret Sberbank (32% të tregut) dhe Vtb (7%). Russia Unicredit ka një kuotë tregu1,1%, austriaku Raiffensbank 1,3% , e po aq edhe Rosbank, kontrolluar prej francezit Société Générale.
Ndërkaq gazi është limfa e ekonomisë ruse, i cili po ashtu nuk u prek nga sanksionet e Amerikës dhe Evropës. Kjo për shkak se në Evropë, Italia dhe Gjermania janë tejet të varura nga Moska për nevojat e tyre, ngase blejnë prej saj rreth 40 30% të gazit që konsumojnë. E teksa Amerika dhe Evropa u akuzuan për marrjen e sanksioneve të buta, Biden u shpreh se “këtu janë, e ca masa do të shihen edhe në vijim”
