Një shtetas shqiptar me inicialet P.F. është arrestuar ditën e djeshme për shkak se është përpjekur të korruptojë një punonjës të policisë. Teksa ka pasur probleme me dokumentacioni për të ikur jashtë, shtetasi është përpjekur t’I ofrojë një shumë policit, duke u filmuar kështu nga kamerat e duke përfunduar në pranga.
Lajmin e bën me dije vetë Policia e Shtetit, e cila në një status të vetin shkruan:
Tentoi të korruptonte punonjësit e Policisë Kufitare, vihet në pranga një shtetas.
Shërbimet e Komisariatit të Policisë Rinas, në vijim të punës me qëllim parandalimin, evidentimin dhe goditjen e paligjshmërisë, kanë evidentuar një rast të mitdhënies duke bërë arrestimin në flagrancë të shtetasit P. F., për veprën penale “Korrupsioni aktiv i personave që ushtrojnë funksione publike”.
Ky shtetas, gjatë përpunimit të linjës ajrore, është paraqitur pranë gabinave të daljes, së bashku me kunatën e tij, e cila kishte mungesë dokumentacioni, dhe për të shmangur refuzimin e daljes, shtetasi P. F., ka tentuar të korruptojë punonjësit e Policisë Kufitare të planizuar me shërbim, duke i ofruar një shumë parash.
Materialet i kaluan Prokurorisë së Rrethit Gjyqësor Tiranë, për veprime të mëtejshme procedurale.
