Kreu i Vetëvendosjes, Albin Kurti, ka folur sot për ditën e gruas, duke e vënë theksin tek nevoja që kanë gratë për më shumë të drejta.
8 Marsi është dita ndërkombëtare e gruas, shkruan ai. E të gjitha grave. Shënon përpjekjet që ende vazhdojnë por edhe sukseset që gratë i kanë arritur historikisht. Sot e çdo ditë duhet ta njohim kontributin e grave që nuk janë më dhe të luftojmë bashkë me gratë për më shumë të drejta. Barra shumë të mëdha u janë lënë grave. Ato jo vetëm e kanë emancipuar veten por tash prej tyre pritet edhe emancipimi i shoqërisë. Duhet ta bëjmë këtë bashkarisht dhe të ndajmë çdo përgjegjësi. Qeverisja jonë do të jetë e përkushtuar ndaj politikave demokratike e sociale që e lehtësojnë dhe e përkrahin jetën dhe përvojat e grave. Qofshin gra punëtore, të papuna, gra rome, të varfra, në kohën kur lindin, apo kur nuk duan të lindin, kur kërkojnë punë apo kur diskriminohen në punë. Prej punëve të shtëpisë e deri te përgjegjësitë institucionale, le ta bëjmë Kosovën më të barabartë. Që kurrë më të mos vriten, shtypen a shfrytëzohen gratë. E, që beteja për barazi shoqërore ta nënkuptojë edhe atë për barazi gjinore.Urime 8 Marsi, nga marshi paqësor në Prishtinë ku morëm pjesë në solidaritet.
Në fotot e publikuara prej tij, bien në sy pankartat e protestës, mes së cilave lexohen parrulla të tilla si Ka ardh sahati me u rrzu patriarkati, Pagë për punët në shtëpi, Pushim të përbashkët prindëror, etj, të cilat sjellin në fokus realietin e hidhur patriarkal në Kosovë dhe nevojën për një ndryshim rrënjësor të tij.
