Ambasadorja amerikane Yuri Kim ka takuar ditën e sotme kreun e Partisë Demokratike Lulëzim Basha. Në deklaratën e dhënë përpara gazetarëve, zonja Kim ndodhej e vetme, pa praninë e kreut demokrat, i cili e përcolli deri tek dera, për t’u kthyer më pas në zyrë.
Në fjalën e saj përpara gazetarëve, Kim përshendeti Bashën për kthimin në parlament të PD-së në shtator, e po ashtu e këshilloi atë të mos e linte partinë peng të një njeriu, duke nxitur kështu dyshimet se i referohet Berishës dhe pranisë së tij si deputet në Parlamentin e ardhshëm. Teksa ftoi edhe PS-në të ngrihej mbi interest partiakë, Kim theksoi mes të tjerave edhe përgjegjësinë e dy liderave të dy partive kryesore për një parlament sa më të denjë.
“Pata një diskutim shumë të mirë dhe të plotë me Kryetarin e PD Lulzim Basha sot, tha Yuri Kim në prononcimin e saj përpara medieve. Ishte në vijim të takimit që ai pati kur Reeker ishte në Tiranë. Folëm për forcën e marrëdhënieve Shqipëri-SHBA, rolin shumë të rëndësishëm që Partia Demokratike ka luajtur në vendosjen e marrëdhënieve SHBA-Shqipëri si dhe rëndësinë që ka që Shqipëria të qëndrojë në rrugën e saj drejt Europës. Nuk ka dyshim për rolin historik që Partia Demokratike ka luajtur, është i pazëvendësueshëm dhe i domosdoshëm dhe, në këtë kuptim është lajm shumë i mirë që PD do të rikthehet në Parlament në shtator.
E kuptoj që PD dhe të tjerë kanë shqetësime në lidhje me zgjedhjet e 25 prillit dhe të gjithë e dimë që ato shqetësime janë pasqyruar në raportin përfundimtar të nxjerrë nga ODIHR. Do të jetë jashtëzakonisht e rëndësishme dhe e nevojshme që institucionet përkatëse t’i trajtojnë ato shqetësime në mënyrë kuptimplotë, dhe Shtetet e Bashkuara do të vazhdojnë të mbështesin këto përpjekje për të përmirësuar në mënyrë konstante zgjedhjet dhe demokracinë në Shqipëri. Teksa PD-ja kthehet në parlament, do të jetë shumë e rëndësishme që partia në pushtet, PS, të tregojë se është serioze për t’u ngritur mbi interesat partiake për hir të vendit.
Do të doja të theksoja gjithashtu përgjegjësinë që kanë kryertarët e partive për t’u siguruar që, kur të hyjnë në atë Parlament, të shoqërohen nga anëtarë që janë të denjë për të përfaqësuar Shqipërinë. Do të jetë veçanërisht e rëndësishme që edhe PD-ja t’i mendojë këto çështje. Siç e përmenda më parë, Partia Demokratike ka luajtur një rol të pazëvendësueshëm, për ta nxjerrë këtë vend nga komunizmi, për ta çliruar nga diktatura. Do të ishte një ironi historike por edhe një tragjedi për vendin, jo vetëm për partinë, nëse partia do të hante bar për hir të interesave personale të një njeriu.
Shpresa jonë është që partitë do të ecin përpara, që ky vend do të ecë përpara, që bashkëpunimi midis Shteteve të Bashkuara dhe Shqipërisë të ecë përpara. E ardhmja po pret. Ka vendime të vështira përpara për të gjithë. Shpresoj që të gjithë të mund të pushojnë mirë gjatë gushtit, por shpresoj edhe që kur të kthehen të freskët dhe të ripërtërirë në vendosmërinë e tyre për të zgjedhur të ardhmen kundrejt të kaluarës, përfundoi fjalën e saj Yuri Kim.
