Dy liderët e Rusisë dhe Kinës, Vladimir Putin dhe Xi Jiping, janë takuar përherë të parë ballë përballë që prej nisjes së pandemisë, këtë të enjte, duke i premtuar njëti-tjetrit bashkëpunim dhe mbështetje, për të marrë së bashku rolin e fuqive të mëdha.
Takimi ndodhi përgjatë samitit të “Shanghai Cooperation Organization” në ish Bashkimin Sovjetik, ku dy krerët përshëndetën qëndrimet e njëri-tjetrit ndaj Perëndimit.
“Kina është e gatshme të bëjë përpjekje së bashku me Rusinë, për të marrë rolin e fuqive të mëdha”, citojnë mediat ruse t’i jetë shprehur Xi Jiping Putinit, “dhe të luajë një rol udhëzues për të sjellë stabilitet dhe energji pozitive, në një botë të tronditur nga trazirat sociale e po ashtu edhe për të mbështetur interesat thelbësore të njëri tjetrit”.
Ndërkaq Putini citohet të ketë deklaruar një qëndrim të qartë ndaj Shteteve të Bashkuara, të cilat sipas tij kanë udhëhequr përpjekjet në mbështetje të Ukrainës, duke vendosur sanksione ndaj Rusisë.
“Përpjekjet për të krijuar një botë unipolare kohët e fundit”, citohet të ketë thënë Putini, “kanë marrë një formë absolutisht të shëmtuar dhe janë krejtësisht të papranueshme. Ne e vlerësojmë shumë pozicionin e ekuilibruar të miqve tanë kinezë në lidhje me krizën ukrainase dhe shprehim mbështetjen tonë ndaj Kinës për Tajvanin. Ne jemi për një Kinë. Ne dënojmë provokimin e SHBA-së dhe satelitëve të tyre në ngushticën e Tajvanit.
Ky ishte takimi i parë personal midis dy liderave, që kur Putin dhe Xi u panë në fillim të shkurtit për Lojërat Olimpike Dimërore në Pekin, disa ditë përpara se lideri rus të niste ofensivën ushtarake në Ukrainë.
Kremlini ka kohë që e promovon samitin e SCO-së në qytetin e lashtë të Rrugës së Mëndafshit të Samarkandit, për të treguar se ekziston edhe një tjetër “alternativë” ndaj institucioneve ndërkombëtare të dominuara nga perëndimi.
SCO – e përbërë nga Kina, India, Pakistani, Rusia dhe vendet ish-sovjetike të Azisë Qendrore të Kazakistanit, Kirgistanit, Taxhikistanit dhe Uzbekistanit – u krijua në 2001 si një organizatë politike, ekonomike dhe e sigurisë, për të rivalizuar institucionet perëndimore. Në këtë samit marrin pjesë tërë krerët e këtyre vendeve, presidenti iranian Ebrahim Raisi, ai turk Rexhep Tajip Erdogan, dhe ai i Bjellorusisë Aleksandër Lukashenko.
Mediat ruse citojnë liderin iranian t’i ketë thënë Putinit se sanksionet e mbështetura nga SHBA ndaj të dy vendeve vetëm do t’i bënin marrëdhëniet e tyre “më të forta”. “Amerikanët mendojnë se cilit vend do të vendosin sanksione, ai nuk do të funksionojë më, por perceptimi i tyre është i gabuar,” citohet të ketë thënë mes të tjerave presidenti iranian Raisi.
