Monitorimi me kamera inteligjente brenda dhe jashtë shkollës, për të kontrolluar fëmijët dhe procesin e mësimdhënies, ishte një tjetër vendim i qeverisë marrë ditën e djeshme, nisur prej ngjarjes tragjike të humbjes së jetës së 14 vjeçarit Martin Cani, nga goditja fatale e një bashkë moshatari me thikë në afërsi të shkollës “Fan Noli”.
Rama deklaroi mes të tjerave se tema e sigurisë në shkolla ka kohë që ndodhet në vëmendjen e qeverisë e se kjo e fundit ka nisur një bashkëpunim me qeverinë e Abu Dhabit për mbështetje financiare, në mënyrë që jo vetëm shteti, por edhe prindërit nëse duan ta kontrollojnë direkte fëmijën e tyre gjatë mësimit, për të parë ecurinë apo problematikat e ndryshme,
“Jemi duke punuar intensivisht, për projektin e ngritjes së një sistemi të ri dixhital, të kontrolit të shkollave dhe të cdo klase, në kuadër të sistemit të ri të monitorimit me kamera inteligjente, të rrugëve kombëtare e të rrugëve të qyteteve tona”, tha Rama. “Po punojmë prej më shumë se një viti për këtë projekt me qeverinë e Emirateve të Bashkuara ku ky sistem është realizuar me një sukses të jashtëzakonshëm, në aspektin e rritjes së sigrisë në përgjithëse, me rezultate absolutisht mbresëlënëse në rritjen e sigurisë dhe të uljes së bullizmit nëpër shkolla. Kemi dakordësuar edhe fondin e financimit nga Abu Dabi, dhe së shpejti do ta prezantojmë publikisht projektin dhe do të nisim punën për zbatimin e tij, të cilën synojmë ta përmbyllim plotësisht hap pas hapi në harkun e 20 muajve, në një kohë që hap pas hapi shkollat do të vijojnë të pajisen me këtë sistem.
Prej disa vitesh kemi ndaluar hyrjen e celularëve nëpër shkolla, por është koha gjithashtu për të rishikuar sanksionet lidhur me shkeljet e këtij rregulli të përgjishëm, ndërkohë që vendosja e punonjëses së sigurisë dhe psikologes në shkollat tona, ka sjellë një sërë rezultatesh pozitive, të cilat padyshim do të thellohen ndjeshëm, me futjen e syve të teknologjisë, në mbikëqyrjen e perimetrit të cdo shkolle e madje të cdo klase, ku prindërit mund të shohin gjithçka ndosh me fëmijën e tyre dhe me procesin e mësim dhënien, sa herë duan të verifikojnë ecurinë apo problematikat lidhur me fëmijët e tyre”, deklaroi mes të tjerave Rama.
