Ditën e sotme Prokuroria e Tiranës ka sekuestruar kartelat në klinikën private ku është kryer operimi dhe kartelën në QSUT ku foshnja është nisur në gjendje kome.
Në kartelën e paraqitur shquhet qartë se të miturit i janë konstatuar 14 dhëmbë për t’u mbushur, tërë dhëmbët në pjesën e sipërme të nofullës dhe 4 dhëmballë në pjesën e poshtme të nofullës.
Si rrodhi ngjarja, që përfundoi me vdekjen e të miturit 3 vjeçar?
I mituri është dërguar nga familjarët në një klinikë dentare për pastrimin e gurëzave të dhëmbëve. Pasi mjeku, Roland Xhaxho i ka bërë grafinë, u ka thënë se fëmija ka 13 apo 14 dhëmbë për rregullim. Për shkak të numrit të lartë, është vendosur që të kryhet ndërhyrja me narkozë. Pas ndërhyrjes që zgjati shumë orë, djali nuk është zgjuar më dhe është dërguar në shtëpi, sepse mjeku iu ka thënë familjarëve se do të zgjohet më vonë. Në shtëpi ai ka shfaqur probleme dhe rritje temperature dhe është dërguar në pediatri ku ka qëndruar në gjendje kome për 2 ditë, duke ndërruar më pas jetë.
Trupi i të miturit është dërguar në morg për kryerjen e autopsisë, ndërkohë që familjarët janë të bindur se fajtorë për ndarjen nga jeta të të shtrenjtit të tyre janë mjeku Roland Xhaxho dhe e bija e tij Ina Xhaxho.
