Është shumë interesante të vëresh se si publiku shqiptar e shan BBV-në, por nuk e lë pa e ndjekur. Për të kuptuar këtë, nuk ke as fare nevojë për statistikat e shikueshmërisë, por mjafton të hapësh fejsbukun personal ditëve kur BBV është në transmetim në prime time, dhe e kupton që kjo është mëse e vërtetë, ngaqë të tëra statuset janë vetëm për të e personazhet e tij.
Ashtu si me Donaldin dhe Borën një vit më parë, kur u stis një goxha intrigë (ata qenë të ndarë, por që Bora hyri, dhe ai e puthi, dhe i nisi një varëse, dhe ajo e priti, dhe pasta ai e tradhëtoi, por tani rrojnë të lumtur bashkë), edhe në rastin e Luisit dhe Kjarës, duket qartë, të paktën për ata që e njohin televizionin nga brenda, se e tëra është bërë për të krijuar së pari suspansë në publik dhe së dyti për të qartësuar se ç’ndjen Kiara për Luizin. Me gjasa djaloshit i kanë thënë bëj diçka që ta marrësh vesh, dhe ai ka sajuar sëmundjen, e cila i dha dorë produksionit të ndërtonte një shfaqe të tërë mbrëmë, nga BBV-ja në spital, e nga spitali në BBV, duke e mbajtur publikun në këmbë, mes merakut për të riun e mes debateve.
Luisi për fat rezultoi mirë (nuk kishte se si të mos rezultonte), Kiara bëri deklaratën e saj që në atë shtëpi nuk rrihej pa Luisin, ndërkohë që sot i paska deklaruar që nuk e do më afër, e se është e tronditur nga ajo që sajoi ai. Dashuriçka janë, thotë populli, e bënë vaki dhe ndodhin. Por a është normale, që një spital i tërë, të vihet në dispozicion të një programi televiziv, me qëllimin argëtimin? E sidomos një department i këtij spitali, që ka parë vetëm lot e ahe?
Edhe këtu publiku (me të drejtë) është i ndarë sërish në mes: a është e drejtë kjo gatishmëri ndaj një spektakli televiziv, e ndaj njerëzve jo?
Pak po e sigurt, qëllimi i medias është të krijojë audiencë (e përmes shikueshmërisë të ardhura), e në emër të kësaj gjëje mund të bëjë dhe të manipulojë shumë gjëra. Qëllimi i spitaleve (e sidomos publike), është t’u përgjigjen me korrektesë tërë atyre që vuajnë prej dickaje, e në kohë sa më të shpejtë, pavarësisht nëse janë VIP-a apo jo, pavarësisht nësse janë përpara kamerave apo jo.
A e bën QSUT-ja jonë një gjë të tillë? Kush i lexon mediat këto ditë, ka lexuar edhe që spitalet janë deri në grykë për hir të virozave, e të afërmit e pacientëve janë përplasur shpesh me mjeket, të cilët janë lodhur me gjasa nga mbingarkesa. Për të kuptuar më shumw, nuk mbetet gjë tjetër, veçse t’ua besojmë këtë mision programeve investigative, që të hetojnë gatishmërinë e QSUT-së në orë kaq të vona sa ai i BBV-së, për të na thënë nëse performojnë njësoj edhe kur nuk ka kamera.
Sa për BBV-në, them se vijim do të shohim një afrim edhe më të madh të Teas me Luizin, e një xhelozi (si qeni) të Kiarës, ose (nëse ai është vërtet kaq i dashuruar sa deklaron) një largim sa më parë prej shtëpisë.
Por pak po e sigurt, ai djalë ua kaloi të tërë aktorëve brenda asaj shtëpieje, duke vërtetuar edhe një herë shprehjen e famshme “Me ken shkodran, tana i ban”!
Nga Albana Nexhipi Lekaj
