Teksa ditën e sotme mbahet në Bruksel samiti i BE-së për Ballkanin Perëndimor, kreu i qeverisë Rama ka deklaruar se pavarësisht se Bullgaria e hoqi veton e saj ndaj Maqedonisë, sërish ai nuk shpreson se sot do të ketë ndonjë haber të mire për Shqipërinë dhe Maqedoninë e Veriut.
Unë ua kam thënë dhe po e përsëris, deklaroi Rama përpara gazetarëve shqiptarë mbledhur atje për rastin, përkundër, optimizmit të ngutur të disave edhe këtu në Bruksel, nuk pres të zgjidhet asgjë në Bullgari, por ndërkohë që, nëse do të zgjidhet, do të jetë një motiv për të marrë frymë të lehtësuar, nga kjo pengmarrje e një vendi të Natos të dy vendeve të Natos, në kulmin e një lufte të nxehtë në kufijtë e Europës dhe nën vështrimin e 26 vendeve të tjera, që shohin si yjet që rrinë e vështrojnë, si në atë romanin e Arcibald Kroninit.
Ndërkaq, i pyetur nga gazetarë të mediave të huaja, Rama nuk ngurroi po ashtu ta cilësonte sërish Bullgarinë si një vend pengmarëës të dy vendeve të Natos, duke theksuar se Shqipëria do të vazhdonte zbatimin e reformave, pavarësisht qendrimeve të BE. I pyetur nëse Shqipëria ndihej viktimë e kësaj situate, Rama u përgjigj se “ne kurrë nuk do të jemi viktimë, sepse ne e dimë prej shumë kohësh e dimë që në këtë rrugë ka një Bullgari këtu e një aty, e një kohësisht ne nuk e ndryshojmë kursin dhe e ndërtojnë Europën në shtëpinë tonë”.
Mes të tjerave, Rama e cilësoi Ballkanin e Hapur si përgjigjen e vërtetë për situatën e integrimit, duke u shprehur se pavarësisht arritjeve në këtë drejtim, Shqipëria do vazhdojë ta ndjekë rrugën e ashpër të integrimit, e se shpirti evropian duhet ndërtuar mbi të gjitha brenda rajonit.
