Shefi i NATO-s Stoltenberg ka deklaruar se Rusia do të përballet me pasoja të rënda nëse përdor armë bërthamore në konfliktin me Ukrainën. “Çdo përdorim i armëve bërthamore do të ndryshonte rrënjësisht natyrën e konfliktit, deklaroi ai në Bruksel pas një takimi dy ditor të Minisrave të Mbrojtjes të NATO-s.
Stoltenberg theksoi po ashtu se pavarësisht retorikës së “rrezikshme e të papërgjegjshme” mbi armët nukleare, Vladimir Putin e di se do t’i duhej të përballej me pasoja serioze nga NATO-ja. pasi do të shkelte një “vijë shumë të rëndësishme”, sikur të përdorte edhe armën më të vogël bërthamore.
Stoltenberg nuk pranoi të ndajë detaje të sakta mbi reagimin e NATO-s ndaj një incidenti të tillë, por pohoi se “rrethanat në të cilat NATO-ja do të përdorte armë bërthamore, janë jashtëzakonisht të pakëta”.
Stoltenberg deklaroi gjithashtu se NATO-ja javën e ardhshme do të zhvillojë stërvitjen e saj vjetore të parandalimit bërthamor “Steadfast Noon”. Stërvitja rutinë e planifikuar prej kohësh, siguron që “aftësitë bërthamore të NATO-s të mbeten të sigurta dhe efektive”, tha mes të tjerave Stoltenberg.
“Parandalimi është mënyra për të parandaluar çdo sulm ndaj një aleati të NATO-s dhe për të ruajtur paqen,” tha ai, duke shtuar se NATO ka demonstruar për dekada se strategjia e saj e parandalimit bërthamor funksionon.
